Putin Ukraina bilan tuzilgan “don bitimi”ni cheklashni Erdo‘g‘on bilan muhokama qiladi

Bugungi kunda “don bitimi” doirasida Ukrainadan olib chiqib ketilgan mahsulotlarning atigi 3 foizi eng kambag‘al mamlakatlarga yo‘naltirilgan. Shu munosabat bilan donni chiqarib ketish yo‘nalishlarini cheklash zarur, dedi Rossiya prezidenti Vladimir Putin Sharqiy iqtisodiy forum (ShIF)ning yalpi sessiyasidagi nutqida.

Uning so‘zlariga ko‘ra, ehtiyojmand mamlakatlarni qo‘llab-quvvatlash uchun tuzilgan “don bitimi” doirasida kemalarning katta qismi Yevroittifoq mamlakatlariga yo‘naltirilgan. “Muhtoj mamlakatlarga yordam berishni ko‘zda tutuvchi BMT Jahon oziq-ovqat dasturi bo‘yicha 87 ta kemaning bor-yo‘g‘i ikkitasiga yuk ortildi. Ularda 2 million tonna oziq-ovqatning 60 ming tonnasi, ya’ni atigi 3 foizi olib ketildi”, — dedi prezident.

Putin qayd etishicha, Yevropa mamlakatlarining xatti-harakatlari mustamlakachilarning harakatlariga o‘xshaydi, rivojlanayotgan mamlakatlar esa “shunchaki yana bir marta aldangan”. “Bunday yondashuv bo‘ladigan bo‘lsa, dunyoda oziq-ovqat muammolari ko‘lami faqat o‘sib boradi… Balki, don va boshqa oziq-ovqatni chiqarib ketish yo‘nalishlarini cheklash haqida o‘ylab ko‘rish kerakdir. Men bu borada Turkiya prezidenti bilan albatta maslahatlashib ko‘raman”, — deya ta’kidladi Rossiya rahbari.

“Don bitimi” Rossiya va Ukraina tomonidan alohida-alohida Turkiya va BMT bilan 22-iyulda imzolangan edi. Tomonlar don ortilgan kemalar Qora dengiz orqali o‘tishi uchun xavfsiz yo‘lak yaratish majburiyatini oldi, BMT, Turkiya va Ukraina vakillari harbiy yuklar ortilishini istisno qilish uchun nazorat olib borishga kelishib oldi. Bitim uzaytirish imkoniyati bilan uch oyga tuzildi. Birinchi yuk kemasi Odessa portidan 1-avgust kuni chiqib ketdi.

24-fevral kuni Rossiya operatsiyasi boshlanganidan keyin Ukraina portlaridan don ortilgan kemalar chiqolmay qolgan edi. Kiyev va G‘arb mamlakatlari bunda Moskvani aybladi va oziq-ovqat inqirozi haqida ogohlantirdi. Rossiya, o‘z navbatida, portlar ukrainalik harbiylar tomonidan minalashtirilgani tufayli oziq-ovqat chiqib ketolmayotganini da’vo qildi. Oxir-oqibat, u yerda, turli hisob-kitoblarga ko‘ra, 4,5 milliondan 20 million tonnagacha bug‘doy va makkajo‘xori to‘planib qoldi.