Erling Holand YCHLdagi 20 ta o‘yinida 25 ta gol urdi. Bunday davrda Ronaldu birorta to‘p kiritolmagan, Messida 8 ta gol bor edi

“Manchester Siti” hujumchisi Erling Holand Yevropa Chempionlar Ligasi 1-turi doirasida “Sevilya”ga qarshi kechgan bahsda (4:0) dublga erishdi.

Norvegiyalik futbolchi “Manchester Siti” safidagi 8-rasmiy o‘yinida 12 ta gol urishga erishdi.

Bu Holand uchun YCHLdagi 20-o‘yin edi. Bu uchrashuvlarda 22 yoshli futbolchi 25 ta to‘p kiritishga muvaffaq bo‘ldi.

Qayd etish kerak, musobaqa to‘purari Krishtianu Ronaldu Chempionlar Ligasidagi dastlabki 20 ta o‘yinida birorta gol ura olmagan, Lionel Messi esa bu davrda 8 ta to‘p kiritgan.

Portugaliyalik 25 gollik dovonni YCHLdagi 63-o‘yinida zabt etgan, argentinalik esa 42-uchrashuvida 25-golini urgan.

Musobaqaning ushbu mavsumini o‘tkazib yuborayotgan Ronalduning hisobida umumiy 140 ta gol bor, Messi esa 125 ta golga ega.