MAGATE missiyasi Zaporojye AESda ikki vakilini qoldirib stansiyani tark etdi

Atom energiyasi bo‘yicha xalqaro agentlik (MAGATE) missiyasi a’zolari Zaporojye AES hududini tark etdi, deb yozmoqda “RIA Novosti” Zaporojye viloyati harbiy-fuqarolik ma’muriyati bosh kengashi a’zosi Vladimir Rogovga tayanib.

Delegatsiyaga hamrohlik qilgan ekspert “TASS”ga guruhning ketganini tasdiqladi, biroq uning so‘zlariga ko‘ra, delegatsiyaning ikki vakili doimiy asosda stansiyada qolgan. ZAES hududida doimiy vakolatxona tashkil etish rejalari haqida 1-sentabr kuni delegatsiya tarkibida stansiyaga tashrif buyurgan MAGATE rahbari Rafael Grossi ma’lum qilgandi.

Missiya stansiyaga iyul—avgust oylarida AESning tez-tez o‘qqa tutilishidan keyingi vaziyatni nazoratga olish uchun kelgandi. Grossining so‘zlariga ko‘ra, ekspertlar “obyektning jismoniy yaxlitligi bir necha bor buzilganini, bu bir necha marta sodir bo‘lganini” qayd etgan. Mutaxassislar o‘q izlarni o‘z ko‘zlari bilan ko‘rdi, deya ta’kidladi u.

MAGATE rahbarining qo‘shimcha qilishicha, keyingi haftada MAGATEning ZAESdagi vaziyat bo‘yicha batafsil hisoboti chop etilishi rejalashtirilgan. Uning ta’kidlashicha, missiyaning olti vakili stantsiyada qolgan, ulardan to‘rt nafari keyinroq jo‘nab ketgan bo‘lishi kerak.

Mavzuga doir:

• Zaporojye AES Ukraina elektr tarmoqlaridan uzildi
• Zelenskiy: Rossiya mustaqil jurnalistlarni Zaporojye AESga MAGATE missiyasi bilan birga kiritmadi