Ijtimoiy tarmoqlar orqali Toshkent shahrida qayta ochilgan Milliy bog‘ hududidagi daraxtlarga shikast yetkazilgani yuzasidan xabarlar e’lon qilindi. Davlat ekologiya qo‘mitasi buni tasdiqladi.
Qo‘mita matbuot xizmatining ma’lum qilishicha, ushbu holat yuzasidan ishchi guruh tuzilib, Toshkent shahar Ekologiya boshqarmasi mas’ullari va mutaxassislari, ommaviy axborot vositalari xodimlari, blogerlar, bog‘ mutasaddilari ishtirokida joyiga chiqib tezkor o‘rganildi.
O‘rganishlar davomida hududdagi mavjud daraxtlar xatlovdan o‘tkazilganda ularning ayrimlariga qurilish-ta’mirlash ishlari natijasida qisman shikast yetkazilgani aniqlandi.
Shundan so‘ng qo‘mita huzuridagi Atrof-muhit va tabiatni muhofaza qilish texnologiyalari ilmiy-tadqiqot instituti va Botanika instituti ilmiy xodimlari jalb etilib, daraxtlarni parvarish qilish ishlarini tashkil etish bo‘yicha tavsiyalar berilgan.
Ayni paytda Davlat ekologiya qo‘mitasi xodimlari tomonidan hududdagi qisman shikastlangan daraxtlarni agrotexnik tadbirlar asosida parvarishlash ishlari davom ettirilmoqda.
Izoh (0)