Ijtimoiy tarmoqlarda Farg‘ona jamoat salomatligi tibbiyot instituti va Kuban davlat tibbiyot universiteti hamkorligida tashkil etilgan qo‘shma ta’lim yo‘nalishida tahsil olayotgan talabalar va ularning ota-onalari murojaati e’lon qilingandi. Institut talabalarining murojaati ijobiy hal etildi, deb xabar bermoqda Sog‘liqni saqlash vazirligi matbuot xizmati.
Qayd etilishicha, murojaatda Kuban davlat tibbiyot universitetida “Stomatologiya” yo‘nalishi bo‘yicha o‘qishni davom ettirish uchun tashkil etilgan imtihonlarda yetarli ball to‘play olmagan ayrim talabalarning noroziligi aks etgan. Mazkur holat yuzasidan tezkor o‘rganishlar olib borilgan.
Farg‘ona jamoat salomatligi tibbiyot institutida 2019–2020-o‘quv yilidan boshlab Rossiyaning Kuban davlat tibbiyot universiteti bilan hamkorlikda “Davolash ishi” va “Stomatologiya” qo‘shma ta’lim yo‘nalishlari tashkil etilgan.
2019-yil 27-martda ikki tomonlama tuzilgan shartnomaga muvofiq, o‘qishga qabul qilingan talabalarning “Davolash ishi” yo‘nalishi bo‘yicha 3 yil O‘zbekistonda va 3 yil Rossiyada, “Stomatologiya” yo‘nalishida esa 3 yil O‘zbekistonda hamda 2 yil Rossiyada ta’lim olishi belgilangan.
2021–2022-o‘quv yili yakuni bo‘yicha “Stomatologiya” yo‘nalishida 46 nafar, “Davolash ishi” yo‘nalishida 40 nafar talaba 3-bosqichni bitirib, 2022-yil 21-avgust kuni Rossiyaning Kuban davlat tibbiyot universitetiga o‘quv yurti mutasaddilari boshchiligida yuborilgan.
25-avgust kuni Kuban davlat tibbiyot universitetida “Stomatologiya” yo‘nalishi bo‘yicha 3-bosqichini bitirgan talabalaridan imtihon olinganda 46 nafaridan 25 nafari belgilangan ballni to‘plab, o‘qishni davom ettirishga tavsiya etilgan. Qolgan 21 nafar talaba belgilanganidan past ball jamg‘argani uchun imtihondan o‘ta olmagan.
Shundan so‘ng ushbu talabalar va ularning ota-onalari tomonidan bildirilgan murojaat asosida Sog‘liqni saqlash vazirligi va Oliy va o‘rta maxsus ta’lim vazirligi Rossiya tomoni, jumladan, Kuban davlat tibbiyot universiteti ma’muriyati bilan tegishli muzokaralar olib bordi. Natijada imtihondan o‘ta olmagan talabalar rus tilini puxta o‘rganish sharti bilan ushbu universitetda o‘qishni davom ettirish imkoniyatiga ega bo‘ldi.
Ma’lumot o‘rnida, o‘qishga qabul qilinmagan ushbu o‘zbekistonlik talabalar 27-avgust kuni YouTube orqali Shavkat Mirziyoyevga murojaat yo‘llagan edi. Unda talabalar aldov yo‘li bilan olib kelinib, Farg‘ona jamoat salomatligi tibbiyot instituti rektori uchrashuvda ularga rad javobini bergani, 20 nafar talaba qabul qilinib, qolganlar chetlatilgani bildirilgandi. Shuningdek, 30-avgust kuni o‘qishga qabul qilinmagan talabalar yotoqxonadan chiqarib yuborilishi ham aytib o‘tilgandi.
Izoh (0)