Qashqadaryoda tibbiy uskunalarni qimmat narxlarda sotib olib, budjet mablag‘larini talon-toroj qilgan tibbiyot muassasalarining mansabdor shaxslariga nisbatan jinoiy jazo choralari qo‘llanildi, deb xabar bermoqda Korrupsiyaga qarshi kurashish agentligi matbuot xizmati.
Ma’lum qilinishicha, agentlik tomonidan 2021-yil iyul oyida Qashqadaryo viloyatida o‘tkazilgan o‘rganish natijalari bo‘yicha 10 ta tibbiyot muassasasi tomonidan 75 dona jami 7,8 milliard so‘mlik tibbiy uskunalar Qarshi shahridagi “D.M.” MCHJdan shartnoma asosida juda qimmat narxlarda budjet mablag‘lari hisobiga sotib olingani aniqlanib, mazkur holat yuzasidan to‘plangan materiallar Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan.
Departamentning viloyat boshqarmasi tomonidan tibbiy uskunalarni asl narxidan 3 milliard 150,6 million so‘mga qimmat narxlarda sotib olingani bo‘yicha 2021-yil 16-dekabr kuni “D.M.” MCHJ rahbari va Qashqadaryodagi 10 ta tibbiyot muassasasi mansabdor shaxslariga nisbatan jinoyat ishi qo‘zg‘atilgan.
(Qashqadaryo viloyati 1-son asab ruhiy kasalliklar dispanseri, viloyat Perinatal markazi, Respublika sud-tibbiy ekspertiza ilmiy-amaliy markazi Qashqadaryo viloyat filiali, Nishon tuman Tibbiyot birlashmasi, Qashqadaryo viloyat bolalar ko‘p tarmoqli tibbiyot markazi, Qashqadaryo viloyat Ftiziatriya dispanseri, Qashqadaryo viloyat Keksalar va nogironligi bo‘lgan shaxslar urush va mehnat faxriylari uchun sanotoriyasi, Qashqadaryo viloyati 2-son asab ruhiy kasalliklar dispanseri, Respublika ixtisoslashtirilgan narkologiya ilmiy-amaliy tibbiyot markazi Qashqadaryo viloyat mintaqaviy filiali, Teri tanosil kasalliklari dispanseri)
Xususan, viloyat bolalar ko‘p tarmoqli tibbiyot markazi “Ultrazvukovaya diagnosticheskaya sistema E-CUBE 8 s 4 datchikami” tibbiy uskunasini 500 million so‘mga (aslida 251,1 mllion so‘mlik) yoki 200 foizga (249,9 million so‘m) ustama qo‘yilgan holda sotib olgan.
Shuningdek, viloyat Teri tanosil kasalliklari dispanseri tomonidan haqiqiy bahosi 386,6 million so‘mlik tibbiy uskunalarni 944,1 million so‘mga xarid qilgani, ya‘ni 557,5 million so‘mga yoki 244,2 foizga qimmat narxlarda sotib olinib, budjet mablag‘lari talon-toroj qilingani sudning hukmi bilan o‘z tasdig‘ini topgan.
Umuman, yuqorida qayd etilgan 10 ta tibbiyot birlashmasida 7,8 milliard so‘mlik harid qilingan tibbiy uskunalar bozor bahosiga nisbatan 3 milliard 150,6 million so‘mga qimmat narxlarda xarid qilinib, budjet mablag‘lari talon-toroj qilingani tergov jarayonida aniqlanib, aybdor shaxslardan 3 milliard 150,6 million so‘m budjetga undirilgan.
Mazkur jinoyat ishi doirasida 10 ta tibbiyot muassasasining 11 nafar mansabdor shaxslari hamda “D.M.” MCHJ rahbari Jinoyat ishlari bo‘yicha Qarshi tumani sudining 2022-yil 4-avgustdagi hukmiga asosan Jinoyat kodeksining tegishli moddalari bilan aybdor deb topilib, ularga nisbatan jinoiy jazo choralari belgilangan.
Shuningdek, ular 1 yil muddatga mansabdorlik lavozimlarida ishlash huquqidan ham mahrum etilgan.
Izoh (0)