“Manchester Yunayted” “Ayaks” futbolchisi uchun 100 million yevro to‘laydi

“Ayaks” vingeri Antoni faoliyatini “Manchester Yunayted”da davom ettiradi, deya xabar beradi jurnalist Fabrisio Romano.

Klublar 22 yoshli futbolchining transferi borasida kelishuvga erishdi. Tez orada Antoni mankunianliklar bilan bir yilga uzaytirish huquqi bilan 2027-yilga qadar mo‘ljallangan shartnomaga imzo chekadi.

De Telegraaf’ning xabariga ko‘ra, braziliyalik futbolchining transfer narxi bonuslar bilan birga 100 millionga baholanmoqda.

Amsterdamliklar avvalroq “Manchester Yunayted”ning 90 million yevrolik taklifini rad etgandi.

Joriy mavsum boshida “Ayaks” bosh murabbiyi Erik ten Hag va himoyachi Lisandro Martines “qizil iblislar” safiga o‘tgan edi.

Antoni so‘nggi bor 14-avgust kuni maydonga tushgan. Niderlandiya chempionatining 2 o‘yinida bitta gol va 2 ta golli uzatmaga mualliflik qilgan.