Namangan viloyati Namangan shahrida tovlamachilik yo‘li bilan fuqarodan pul talab qilgan shaxslar qo‘lga olindi. Bu haqda Ichki ishlar vazirligi xabar qildi.
IIV Uyushgan jinoyatchilik va qurol bilan qonunga xilof ravishda muomala qilishga qarshi kurashish bo‘limi hamda DXX xodimlari tomonidan tezkor tadbir o‘tkazilgan. Jarayon davomida Namangan shahrida yashovchi fuqaro N.B. (1977-yilda tug‘ilgan)ga Ohangaron tumanida joylashgan “Rohat” choyxonasi oldida 4 nafar shaxs Lacetti va Spark avtomashinasini 3,5 ming dollarga sotishni va’da qilgani aniqlangan.
Ular avtomashinalarni sotmasdan, uning pullari va 2 juft avtomashina davlat raqamlarini o‘tkir tig‘li jism bilan qo‘rqitgan holda zo‘rlik bilan tortib olib, mazkur davlat raqamlarini qaytarish evaziga tovlamachilik yo‘li bilan 1 ming dollar talab qilgan.
Yangiyo‘l tumani hududida yashovchi shaxslar — fuqaro A.J. (1983-yilda tug‘ilgan), fuqaro Y.S. (2000-yilda tug‘ilgan), fuqaro U.S. (1994-yilda tug‘ilgan) va fuqaro A.Sh. (2000-yilda tug‘ilgan) ushbu pullarni Zangiota tumanida joylashgan “Yong‘oq” kafesida olgan vaqtlarida tadbir ishtirokchilari tomonidan ashyoviy dalillar bilan qo‘lga olingan.
Holat yuzasidan to‘plangan hujjatlar qonuniy qaror qabul qilishlik uchun Zangiota tumani IIBga taqdim etilgan. Hozirda gumon qilinuvchilarning boshqa jinoyatlarga aloqadorligi tekshirilmoqda.
Izoh (0)