Markaziy bankning esdalik oltin tangalari va suvenirlar to‘plamlari –999,9 asillik darajasiga ega bo‘lgan sof oltindan tayyorlangan. Bu haqda FinLit ma’lumot bermoqda.
Mazkur esdalik tangalar va suvenirlar to‘plamlari ularning texnik xususiyatlarini tasdiqlovchi asillik sertifikatlari bilan sotuvga chiqariladi.
Esdalik tangalari va suvenirlar to‘plamlarning sotuv narxi qimmatbaho metallning jahon bozoridagi narxi va ushbu narxga qo‘llaniladigan marjaga asosan belgilanadi va Markaziy bank tomonidan har kuni milliy valyutada e’lon qilinadi.
Esdalik tangalar va suvenirlar to‘plamlarni qayerdan sotib olish mumkin?
Esdalik tangalari va suvenirlar to‘plamlarini tijorat banklarida sotib olish mumkin.
Esdalik tangalarni qaytarib xarid qilib olish Markaziy bank rasmiy saytida ko‘rsatilgan esdalik tangalarining sotuvi tashkil qilingan tijorat banklari orqali quyidagi tartibda amalga oshiriladi.
Esdalik tanga egasi o‘ziga qulay bo‘lgan tijorat bankiga murojaat qilishi va esdalik tangani sertifikati bilan birga taqdim etishi lozim. Esdalik tangalari va suvenirlar to‘plamlarini qaytarib xarid qilib olishda jismoniy shaxs yoki yuridik shaxs vakilining shaxsini tasdiqlovchi hujjati asosida dalolatnoma rasmiylashtiriladi.
Bunda yuridik shaxsning vakili esdalik tangasi va suvenirlar to‘plamini tasarruf etish huquqi borligi to‘g‘risidagi ishonchnomani taqdim etishi kerak. Dalolatnoma uch nusxada tuziladi.
Undan so‘ng tegishli tijorat banki 10 kun ichida esdalik tangani texnik ekspertizadan o‘tkazish uchun Davlat asillik darajasini belgilash palatasiga topshiradi. Palata, o‘z navbatida, ekspertiza o‘tkazadi hamda 10 kun ichida natijalarni taqdim etadi.
Palataning texnik ekspertiza to‘g‘risidagi xulosasini qabul qilingandan so‘ng Markaziy bank 10 kun ichida esdalik tangalarni qaytarib xarid qilib olgan tijorat banki orqali esdalik tanga egasi bilan hisob-kitoblarni amalga oshiradi.
Esdalik tangalari va suvenirlar to‘plamlarini qaytarib sotib olish qiymati, uni topshirilgan kundagi bir gramm qimmatbaho metall narxi va ushbu narxga qo‘llaniladigan chegirmadan kelib chiqib hisoblanadi.
Esdalik tangalar va suvenirlar to‘plamlarini qanday saqlash lozim?
Qimmatbaho metallardan tayyorlangan esdalik tangalari ularga mexanik shikast yetmaydigan sharoitlarda saqlanishi kerak.
Tangalarni tarkibida aktiv kimyoviy birikmalar mavjud bo‘lgan maishiy kimyo mahsulotlari, kosmetik va dori vositalari bilan birga saqlash mumkin emas. Ayniqsa, tangalarni xlor, yod va simob kabi birikmalarga yaqin saqlash nihoyatda xavflidir.
Tangalarni qolibsiz (qattiq va shaffof kapsulalar) polivinilxloriddan tayyorlangan albomlarda (rangsiz, shaffof plastmassa, termoplastik polimer) saqlash umuman tavsiya etilmaydi.
Polivinilxlorid vaqt o‘tishi bilan yoriladi va o‘zidan xlororganik birikmalarni chiqarib, tangalarda yashil dog‘larni paydo qilishi va ular sifatining yomonlashishiga olib kelishi mumkin.
Shuningdek, tangalarni banknotalar bilan birga saqlash ham tavsiya etilmaydi, chunki bo‘yoq va qog‘ozda oltingugurt birikmalari mavjud bo‘lib, ular tanga yuzasi qorayishini keltirib chiqarishi mumkin.
Esdalik tangalar va suvenirlar to‘plamlari maxsus qattiq va shaffof kapsulalar bilan qadoqlangan holda sotuvga chiqarilgan. Ular tangalarni qattiq predmetlarning tegib ketishidan, chang va boshqa mayda zarrachalardan himoya qiladi.
Tangalarni kapsuladan chiqarib yuzasini qo‘l bilan ushlash qat’iyan tavsiya etilmaydi. Chunki tanganing silliq yuzasiga tushgan barmoq izlarini tozalash natijasida u shikastlashi mumkin va avvalgiday holati yo‘qolishi mumkin.
Agar tangani kapsuladan chiqarish kerak bo‘lib qolsa, uchlari rezinali maxsus pinset bilan yoki matoli qo‘lqopda tanganing yonidan ushlab chiqarilishi lozim.
Izoh (0)