Ijtimoiy tarmoqlarda Farg‘ona shahri markazidagi ko‘chada daraxtlar tomiri bilan ko‘chirilgani yuzasidan videolavha tarqaldi. Shahar hokimligi axborot xizmati holat yuzasidan ma’lumot berdi.
Xabarlarda “Oybek” mahalla fuqarolar yig‘ini Pahlavon Mahmud ko‘chasida tadbirkor tomonidan qurilish ishlari olib borilayotgani keltirilgan. Mazkur holat shahar hokimligi mutaxassislari hamda viloyat ekologiya boshqarmasining shahar bo‘limi inspektorlari tomonidan o‘rganildi.
O‘rganish jarayonida hududdagi manzarali daraxtlarga shikast yetkazilmagani, faqatgina mevali daraxtlar kesilgani aniqlandi.
“O‘simlik dunyosini muhofaza qilish va undan foydalanish to‘g‘risida”gi qonunning 45-moddasi 4-bandiga asosan, yog‘och olish va mevalar yetishtirish uchun maxsus ekilgan, yuridik yoki jismoniy shaxsning mulki bo‘lgan daraxtlar va butalarni kesish uchun ruxsatnoma talab etilmasligi belgilangan.
Hozirda qurilish maydoni atrofidagi mavjud daraxtlar xatlovdan o‘tkazilib, ekologiya boshqarmasining Farg‘ona shahri bo‘limi tomonidan nazoratga olindi.
Izoh (0)