AQSH prezidenti Jo Bayden Vladimir Zelenskiy bilan Kiyevni qo‘llab-quvvatlash va harbiy yordamning yangi paketini muhokama qildi, deb xabar bermoqda Oq uy matbuot kotibi Karine Jan-Pyer.
“Prezident Ukrainani qo‘llab-quvvatlashini yana bir bor tasdiqladi”, — deydi u jurnalistlarga. Suhbat chog‘ida, shuningdek, AQSHning qariyb 3 milliard dollarlik yordami muhokama qilingan.
Jan-Pyerning qo‘shimcha qilishicha, Bayden Zaporojye atom elektr stansiyasi atrofidagi vaziyatga ham to‘xtalgan. Uning ta’kidlashicha, Qo‘shma Shtatlar stansiya atrofida qurolsizlantirilgan zona tashkil etishga va xalqaro inspektorlarning AESga kirishiga ruxsat berishga chaqirmoqda.
Avvalroq Bayden Ukrainaga eng yirik — 2,98 milliard dollarlik harbiy yordam paketi taqdim etilganini e’lon qilgandi. Prezidentning Ukraina Mustaqillik kunidagi bayonotiga ko‘ra, o‘tgan olti oy ichida ukrainaliklar o‘z jasorati va ozodlik yo‘lida ko‘rsatayotgan fidoyiliklari bilan dunyoni ilhomlantirdi. Ular Rossiyaning Ukrainaga to‘liq miqyosda bostirib kirishi qarshisida qat’iy va kuchli tura oldi. Bugungi kun nafaqat o‘tmishga daxldor bayram, balki Ukraina suveren va mustaqil davlat ekani va shunday bo‘lib qolishini tasdiqlovchi kundir.
Izoh (0)