Surxondaryoda tanishining uyidan 150 mln so‘mlik tilla taqinchoqlarni o‘g‘irlab ketgan shaxs ushlandi

Surxondaryo viloyati Sariosiyo tumanida taqinchoqlar o‘g‘risi fosh etildi, deb xabar bermoqda Ichki ishlar vazirligi.

Qayd etilishicha, 8-avgust kuni tumanning “Neloba” mahallasida yashovchi, B.B. IIBga ariza bilan murojaat qilgan. U arizasida 2021-yil avgust—sentabr oylarida shu tumanda yashovchi T.S. uning uyida vaqtincha yashab kelib, 150 million so‘mlik har xil tillo taqinchoqlarini o‘g‘irlab ketganini bildirgan.

Ichki ishlar organlari tomonidan olib borilgan surishtiruv ishlari davomida ushbu jinoyatni T.S. sodir etgani aniqlanib, ashyoviy dalillar olingan.

Holat yuzasidan Jinoyat kodeksining 169-moddasi (o‘g‘rilik) 3-qismi “a” bandi bilan jinoyat ishi qo‘zg‘atilgan.