“Sahar” guruhi asoschisi Anvar Jo‘rayevning onasi Dilbar Nabiyeva “Sevimli” telekanalining “Mashhurlar” ko‘rsatuviga bergan intervyusida o‘g‘lining prokuror bo‘lishini xohlagani, “Yomg‘ir” taronasini yozdirish uchun turmush o‘rtog‘idan yashirib, 500 dollar bergani, uning rok yo‘nalishda qo‘shiq kuylashiga munosabati, guruhning Qozog‘istonga borib ijod qilgan paytlaridagi qiyinchiliklari haqida gapirdi.
Anvar Jo‘rayevning onasi o‘g‘lining prokuror bo‘lishini xohlagani, “Yomg‘ir” taronasini yozdirish uchun turmush o‘rtog‘idan yashirib, 500 dollar bergani haqida
O‘g‘limga sen artist bo‘lolmaysan, bizning avlodimizda san’atkorlar yo‘q deb aytganman. Ko‘plab onalar qatori uning prokuror bo‘lishini istaganman. Keyin o‘g‘lim: men Toshkent shahri prokurori bo‘lsam ham stolni surib, gitaramni olib ashulamni aytaman, dedi.O‘shanda biz Toshkentga ko‘chib kelgan edik, men Chinnibozorda ishlar edim, Anvar esa narsalarga qorovullik qilardi. Keyin u dadamga aytmasdan menga 500 dollar bering, bitta ashula yozdiray deb so‘ragan, shunda borib birinchi taronasi “Yomg‘ir”ni yozdirgan.
O‘shanda ashulani bitta kichkina kassetaga yozdirib olib kelgan, bozordagilar hammamiz o‘tirib shuni tingladik. Qo‘shiqni tinglab, hamma quvondi. Keyin men ham qiziqib qoldim, sababi radiolarda, taksiga o‘tirsak ham shuni eshitib qolar edik. Shu bilan ikkinchi, uchinchi, umuman olganda 13 ta ashulasiga men homiylik qilib yozdirganman.Xonandaning onasi uning rok yo‘nalishda qo‘shiq kuylashiga qanday munosabat bildiradi?
Rostini aytsam haqiqatan bu yo‘nalishda qo‘shiq kuylashini qo‘llamadim. Unga qanaqa qo‘shiq aytyapsan, seni to‘ylarga chiqib, davrani qizdiradigan ashula aytasan deb o‘ylardim, dedim. Avvaliga tushunmadim, bu yo‘nalishning ham o‘zining muxlislari bor ekan, o‘zini auditoriyasi bo‘lar ekan. Keyin-keyin tushunib yetdim, — deydi Dilbar Nabiyeva.
Anvar Jo‘rayevning onasi “Sahar” guruhining Qozog‘istondagi qiyinchiliklari haqida
Haqiqatan ham uning rok yo‘nalishini bu yerda uncha tushunishmadi. Keyin u guruhi bilan Olmaotaga borib, bitta uyni ijaraga olib, simkaravotlarda yotib kun kechirgan, o‘sha paytlari ham orqasidan borib nazorat qilganman. Yomon yo‘llarga kirib ketmasin, deb Olmaota shahriga borganman va ertalabdan bitta kefir bilan bitta shirinlikni yeb o‘tirganining guvohi bo‘lganman.O‘sha paytlari o‘zim ham mahsulot olib ketardim va bolamni ham ko‘rib kelar edim. Rosa qiynalgan, to‘rtta bola daraxtlarga e’lon yopishtirib kimga musiqachi kerak, tug‘ilgan kun, tadbirlarni o‘tkazamiz deb yurgan. Keyin Qozog‘istonda uni yaxshi tushunishdi va qabul qilishdi. Qozog‘istonda unga yaxshi haq to‘lashgan, shunda Anvar menga ham yordam bergan, — deydi xonandaning onasi.
Mavzuga doir:
Izoh (0)