Qoraqalpog‘istondagi holatlar va voqealar yuzasidan qo‘zg‘atilgan jinoyat ishlari bo‘yicha ayblanayotgan shaxslarning huquq va qonuniy manfaatlarini himoya qilayotgan advokatlar bilan 16-avgust kuni uchrashuv tashkil etildi. Bu haqda Oliy Majlisning Inson huquqlari bo‘yicha vakili (ombudsman) axborot xizmati xabar berdi.
Ta’kidlanishicha, komissiya a’zolari namoyishlar paytida qo‘lga olingan shaxslarga himoyalanish huquqining ta’minlanganlik holatini o‘rganish maqsadida Qoraqalpog‘iston Adliya vazirligi hamda Advokatlar palatasining hududiy boshqarmasi vakillari bilan uchrashgan edi.
O‘zaro suhbat davomida advokatlarga komissiya, uning tashkil etilish asoslari, faoliyati va shu kunga qadar amalga oshirilgan ishlar bo‘yicha qisqacha tushuntirishlar berildi.
Shuningdek, Qoraqalpog‘istondagi voqea va holatlar bo‘yicha olib borilayotgan tergov harakatlari haqida advokatlarning fikrlari o‘rganildi. Xususan, tergov hibsxonasida himoyasi ostidagi shaxslar bilan uchrashish bo‘yicha to‘sqinlik qilish, ushlab turilgan shaxslarga yaqin qarindoshlari tomonidan yo‘qlovlar kiritish holatlari, tergov harakatlari davomida qiynoqqa yo‘l qo‘yish holatlari bo‘yicha himoya ostidagilar xususida ma’lumot olindi.
Bundan tashqari, tergov xonalarining videokuzatuv kameralari bilan ta’minlangani va advokatlarning videoyozuvlarni so‘rab olish huquqidan foydalangani bo‘yicha ma’lumot olindi. Shu kunning o‘zida komissiya shtabiga kelgan 20 nafarga yaqin fuqaroning murojaatlari qabul qilindi.
Izoh (0)