Bekobod shahri va Bektemir tumanlarida tadbirkorlarning mulklarini talon-toroj qilgan shaxslar aniqlandi. Bu haqda Iqtisodiy jinoyatlarga qarshi kurashish departamenti ma’lum qildi.
Qayd etilishicha, Bosh prokuratura huzuridagi departamentning Bekobod shahri bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Unda “B.A.” MCHJ muhandisi D.Z. o‘zining moddiy javobgarligidagi avtotransport vositalarining ehtiyot qismlarini sotib yuborib, tadbirkorning jami 214,6 million so‘mlik mulkini o‘zlashtirgani aniqlangan.
Bektemir tumani bo‘limi tomonidan o‘tkazilgan tergovga qadar tekshiruvda esa “G.P.” MCHJga qarashli dorixona filiali xodimi D.Yu. va boshqalar MCHJga tegishli jami 1630 nomdagi 176 million so‘mlik dori vositalarini noma’lum shaxslarga sotib yuborib, ushbu mablag‘larni kirim qilmasdan, o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)