O‘zbekistonda mansabdor shaxslarning qarori va harakati ustidan sudga shikoyat qilish muddati olti oyga uzaytiriladi

Ma’muriy organ va fuqarolar o‘zini-o‘zi boshqarish organi mansabdor shaxslarning qarori va harakati ustidan sudga shikoyat qilish muddati olti oyga uzaytiriladi.

AOKAda o‘tkazilgan brifingda Oliy sud axborot xizmati rahbari Aziz Obidov sudga murojaat qilishni yanada erkinlashtirishga qaratilgan yangi qonun loyihalari haqida ma’lumot berdi.

Shuningdek, tadbirkorlik subyektlarining apellyatsiya shikoyati berish muddatini ham olti oyga uzaytirish taklif qilinmoqda.

Bundan tashqari, fuqarolar tomonidan davlat xizmatlarini ko‘rsatishga vakolatli idoralarning xatti-harakatlari ustidan ma’muriy sudlarga beriladigan arizalar uchun undiriladigan davlat boji miqdorini kamaytirish ham ko‘zda tutilgan.

Amaldagi qonunlarga kiritilishi taklif etilayotgan o‘zgartish va qo‘shimchalar davlat xizmatlarini ko‘rsatish sohasida jismoniy va yuridik shaxslarning buzilgan huquq va manfaatlari sudlar orqali himoya qilinishi imkoniyatlarini kengaytirishga xizmat qiladi.