Oxirgi 6 yil ichida gemodializ xizmati sifati tubdan o‘zgardi, natijada 2016-yilda faoliyat ko‘rsatgan gemodializ xizmatini ko‘rsatuvchi bo‘limlar soni 29 tadan 65 taga yetkazildi. Gemodializ uskunalari miqdori esa 240 tadan 690 taga ortdi.
2016-yilda viloyat markazlaridan tashqari mamlakatning faqatgina 2 ta tumanida bo‘lgan ushbu xizmat 2022-yilga kelib, 23 ta tumanda yo‘lga qo‘yildi.
Shuningdek, Qoraqalpog‘iston Respublikasi, Xorazm viloyati va Toshkent shahrida 1 100 nafar bemorga gemodializ xizmatini ko‘rsatish bo‘yicha Hindistonning Nephrocare Health Services Central Asia kompaniyasi bilan davlat-xususiy sheriklik asosidagi bitim imzolandi.
Unga ko‘ra, 2022-yil aprel oyida Nukus shahrida 150 nafar bemorga xizmat ko‘rsatuvchi yangi gemodializ klinikasi faoliyati yo‘lga qo‘yildi.
Yaqinda Xorazm viloyatining Urganch va Bog‘ot tumanlarida 250 nafar bemorga xizmat ko‘rsatuvchi gemodializ klinikalari ish boshladi. Sentabr oyidan esa Toshkent shahrida 700 nafar bemorga xizmat ko‘rsatuvchi shunday muassasa faoliyati yo‘lga qo‘yiladi.
Doimiy gemodializ muolajasini olayotgan 4 456 nafar bemor qo‘shimcha 5 turdagi dori vositalari (geparin, eritropoetin, temir preparatlari, B va C guruh vitaminlari) bilan bepul ta’minlanmoqda.
Gemodializ xizmatini rivojlantirish maqsadida Davlat budjetidan ajratilayotgan mablag‘lar miqdori 8 barobargacha ortdi. Ya’ni 2016-yilda bu sohaga 18 milliard so‘m yo‘naltirilgan bo‘lsa, 2022-yilda ajratilayotgan mablag‘lar miqdori 145 milliard so‘mga yetdi.
Kelgusida viloyatlar markazidan 50–100 kilometrgacha uzoqlikda bo‘lgan jami 51 ta tumanda (hozir 23 ta) 2022-yil yakunigacha gemodializ xizmati yo‘lga qo‘yilib, 528 nafar bemorga o‘zi yashab turgan hududda muolaja olish imkoni yaratiladi.
Izoh (0)