Farg‘onada fuqaro opiy va psixotrop dorini 500 ming so‘mga sotayotganda ushlandi

Farg‘ona viloyati Qo‘qon shahrida giyohvandlik moddasini sotgan shaxs qo‘lga olindi. Bu haqda Ichki ishlar vazirligi axborot xizmati xabar berdi.

Xabar qilinishicha, 9-avgust kuni o‘tkazilgan tezkor tadbir davomida Sh.Birlashuv ko‘chasida yashovchi Sh.M. yashash xonadonida opiy giyohvandlik vositasi va bir dona yelim idishdagi “Tropikamid 10 ml” nomli kuchli ta’sir qiluvchi dori vositasini 500 ming so‘m evaziga sotgan vaqtida daliliy ashyo bilan ushlangan.

Holat yuzasidan shahar IIB huzuridagi tergov bo‘limi tomonidan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) 2-qismi bilan jinoyat ishi qo‘zg‘atilib, u protsessual tartibda ushlangan.

Jinoyat kodeksining 273-moddasi 2-qismida ko‘rsatilgan jinoyatni sodir etgan shaxs yetti yilgacha ozodlikdan mahrum qilish bilan jazolanishi mumkin.