Farg‘onada mustaqillik bayrami munosabati bilan 19 nafar ehtiyojmand bolaning sunnat to‘yi o‘tkazildi. Bu haqda “Daryo” muxbiri Azizjon Ermatov xabar berdi.
Ta’kidlanishicha, Farg‘ona tumanidagi “Mindon” tantanalar majmuasida o‘tkazilgan tantanada ehtiyojmand va “Ayollar daftari”ga kiritilgan oilalarning 19 nafar farzandiga sunnat to‘yi o‘tkazib berilgan.
Tuman kengashi deputati homiyligida jamoat tashkilotlari bilan hamkorlikda o‘tkazilgan to‘yda Farg‘ona viloyati hokimi Xayrullo Bozorov, mahalla faollari, bolalarning ota-onalari, yaqin qarindoshlari hamda do‘stlari ishtirok etgan. Shuningdek, to‘yda ehtiyojmand oilalarning 200 nafardan ortiq farzandlari mehmon bo‘lgan.
To‘yda bolalarga sarpolar kiydirilib, homiy tashkilotlarning velosiped va boshqa qimmatbaho sovg‘alari topshirilgan. Shuningdek, to‘y bolalarning nomiga bankda omonat daftarchalari ochilib, to‘yona mablag‘i o‘tkazilgan.
Izoh (0)