Toshkentda o‘z onasini o‘ldirgan ayolga sud hukmi o‘qildi. Bu haqda Toshkent shahar sudlari matbuot xizmati “Daryo”ga xabar berdi.
Ma’lum qilinishicha, 70 yoshli X.B. (ism-shariflar o‘zgartirilgan) 96 yoshni qarshilagan onasi S.S. operatsiya bo‘lib chiqqandan keyin unga qaraydigan bo‘ldi. Yuzga yaqinlashgan ona hassasiz yurolmas, og‘riq azobidan tun-u kun ingrab chiqardi. Bora-bora bu X.B.ni charchatdi, asablari tamom bo‘ldi. Bu xonadondagi baqir-chaqirlarni qo‘shnilar ham bilib bo‘lishdi.
Bir kun X.B. uxlab yotgan onasining ko‘kragiga bir necha bor pichoq sanchdi. Onasini o‘ldirib qo‘yganini anglagach, endi o‘zini o‘ldirish maqsadida qo‘lidagi pichoq bilan chap bilagi va bo‘ynini hamda ko‘krak qafaslarini kesib tashladi. Bu orada singlisi uyga kelib qoladi. Tez tibbiy yordam chaqirtirdi.
Jabrlanuvchi shifokorlar tomonidan ko‘rsatilgan bir necha kunlik tibbiy yordamga qaramasdan vafot etdi.
X.B.ga Jinoyat kodeksi 97-moddasi 2 qismi “v” bandi bilan jinoyat ishi qo‘zg‘atilib, ish sudga oshirildi.
Sud majlisida X.B.ning qo‘shnilari N.R., X.A., T.A. va boshqalar sudlanuvchining yaxshi ayol bo‘lgani, turmushga chiqmasa-da, ota-onasiga qaragani, mehribonligi, ziyoli ekani, keyingi paytda S.S.ning baqir-chaqirlarini ular ham eshitishganini, unga nisbatan yengil jazo tayinlashni so‘rashdi.
Sudda X.B. aybli deb topildi. Jinoyat kodeksining 97-moddasi 2-qismi “v” bandi bilan 15 yil ozodlikdan mahrum qilish jazosi tayinlanib, Jinoyat kodeksining 72-moddasi orqali tayinlangan jazo shartliga almashtirilib, 3 yil sinov muddati belgilandi.
X.B.ga yashash joyi o‘zgargan taqdirda, bu haqida uning xulqi ustidan nazorat olib boruvchi ichki ishlar idoralariga xabar berish va 1 oyda ikki marotaba kelib, bu organlarda ro‘yxatdan o‘tib turish majburiyati yuklatildi, unga sinov muddati davomida hukm shartlarini buzgan taqdirda, Jinoyat kodeksi 72-moddasining 6 va 8-bandida ko‘rsatilgan oqibatlar yuzaga kelishi mumkinligi tushuntirildi. X.B.ga nisbatan qo‘llanilgan ehtiyot chorasi o‘zgartirilib, u darhol sud zalida qamoqdan ozod qilindi.
Ayni paytda sudlanuvchi X.B. qonunda belgilangan jazoni shartli o‘tamoqda.
Izoh (0)