“Barselona” yana Barca Studios’ning ma’lum ulushini sotib yubordi. Klub yangi futbolchilarni ro‘yxatdan o‘tkazish uchun mablag‘ga muhtoj

“Barselona” to‘rtinchi moliyaviy dastakni faollashtirdi. Bu haqda klub rasmiy saytida ma’lum qilindi.

Katalon klubi Barca Studios aksiyalarining 24,5 foizini 100 million yevro evaziga Orpheus Media’ga sotgan.

Avvalroq “Barselona” uchta moliyaviy dastakni faollashtirgandi. Unda klub La Liga translyatsiya huquqining 25 foizini 25 yilga bergan, shuningdek, Barca Studios’ning 24,5 foizini sotib yuborgandi.

“Barselona” oldida yangi futbolchilarni La Liga ro‘yxatidan o‘tkazish vazifasi turibdi. Katalonlar yozda Robert Levandovski, Frank Kessie, Jyul Kunde, Rafinya Dias va Andreas Kristensenni o‘z safiga qo‘shib oldi. Shuningdek, Usmon Dembele va Serxi Roberto bilan yangi bitim imzoladi. La Liga boshlanish arafasida ular hamon ro‘yxatdan o‘tkazilmagan.