Namanganda “kelib-ketuvchilar”ga qilingan xarajatni qoplash uchun o‘qituvchilar pul yig‘ib berishlari kerakligini aytgan maktab direktoriga chora ko‘riladigan bo‘ldi

“Daryo”ga murojaatchi tomonidan taqdim etilgan va keyinchalik saytda e’lon qilingan videoda Namangan shahridagi maktablardan birining direktori bu yerga kelib-ketuvchilar uchun xarajat qilganini ta’kidlab, o‘qituvchilar pul yig‘ib berishlari kerakligini aytgandi. Mazkur holat yuzasidan “Daryo” muxbirining so‘roviga javoban Namangan viloyat xalq ta’limi boshqarmasi mutasaddilari munosabat bildirdi.

Qayd etilishicha, ta’lim muassasasi — Namangan shahridagi 38-umumta’lim maktabida Xalq ta’limi vazirligining nazorat- huquqiy inspeksiyasi vakillari va viloyat xalq ta’limi boshqarmasi mas’ul xodimlari tomonidan o‘rganish olib borilgan.

Maktab o‘qituvchilari bilan o‘tkazilgan suhbat jarayonida videolavhada keltirilgan gaplar haqiqatan maktab direktori tomonidan aytilgani, biroq pedagog-xodimlardan pul mablag‘lari yig‘ilmagani ma’lum bo‘ldi.

“Maktab direktori Abdulahad Rahimovdan tushuntirish xati olinib, o‘z ishiga nisbatan mas’uliyatsiz va layoqatsizlik, sovuqqonlik bilan yondashgani uchun mehnat ta’tili davri tugaganidan so‘ng unga nisbatan qonunda belgilangan tartibda intizomiy jazo chorasi qo‘llanilishi bildiriladi”, — deyiladi munosabatda.

Namangan viloyat xalq ta’limi boshqarmasi mutasaddilari maktablarda noqonuniy pul yig‘ish va boshqa har qanday turdagi majburlovlarga qarshi ekanliklari va bunga yo‘l qo‘yilmasligini ta’kidlagan.