Buxoroda Matiz haydovchisi beton to‘siqqa urilib, voqea joyida vafot etdi. Marhum shifokor bo‘lgani aytilmoqda

Buxoro viloyatining Romitan tumanida Matiz haydovchisi bo‘lgan shifokor beton to‘siqqa urilib, YTH qurboniga aylandi deya xabar berdi “Daryo” muxbiri.

Ma’lum bo‘lishicha, voqea 2022-yilning 6-avgust kuni taxminan soat 23:00 larda A-380 xalqaro ahamiyatga ega Buxoro—Gazli avtomobil yo‘lida sodir bo‘lgan.

“Men har kuni aynan shu Jo‘yzar mahallasini kesib o‘tuvchi Buxoro—Gazli yo‘lidan yuraman. Yo‘l xalqaro ahamiyatga ega, ammo, ta’mirlash ishlari bois, yo‘lning yarmigacha beton-to‘siqlar qo‘yilgan. Qatnov og‘ir, juda tor yo‘ldan harakatlanamiz. 5—7- kilometrgacha qo‘yilgan beton-to‘siqlar transport vositalarining harakatlanishiga xalal beradi. Kecha kechki payt shu yo‘lda yo‘l transport hodisasi sodir bo‘ldi. Men aynan voqea joyida to‘xtadim”, — deydi voqea haqida xabar bergan haydovchi.

Kirakashning aytishicha, voqea joyiga to‘plangan haydovchi va yo‘lovchilar tez tibbiy yordam mashinasiga bir necha bor qo‘ng‘iroq qilgan.

“Oradan 15—20 daqiqa o‘tishiga qaramay, tez tibbiy yordam mashinasi yetib kelmadi. Tez yordam mashinasi jo‘natuvchi operator  tushuntirishlarga qaramay, manzil qayerda ekanini topolmay, vaqt cho‘zildi. Tez yordam mashinasi yetib kelguncha esa murdanineg tanasi sovib ulgurgan edi”, — deydi u.

“Daryo” muxbiri holatga aniqlik kiritish uchun viloyat YHXB mas’uli bilan bog‘langan. Mas’ul esa bu baxtsiz hodisadan xabari yo‘qligini bildirgan.

“Marhum har kuni shu yo‘ldan harakatlangan bo‘lsa, yo‘lning ta’mirlanayotganidan xabardor bo‘lgan bo‘lishi kerak. Beton to‘siq qo‘yilgandan keyin 500 metrcha masofa oldinda yo‘lsozlar tomonidan ogohlantiruvchi yo‘l belgilari o‘rnatiladi. O‘rnatilmasa, buning javobgarligi bor. Ushbu yo‘l A-380 xalqaro ahamiyatga ega bo‘lib, undan Turkiya, Rossiya Federatsiyasi, Qozog‘iston, Tojikiston, Turkmaniston kabi qator davlatlarning yuk mashinalari qatnaydi. Kechki payt yo‘lning ta’mir qismi yoritilmagan bo‘lishi va shuning hisobiga haydovchi bunga ahamiyat qaratmagan bo‘lishi ham mumkin. Lekin barcha yo‘l belgilari nur qaytaruvchi vositalar bilan jihozlangan bo‘ladi”, —dedi viloyat IIB YHXB axborot xizmati boshlig‘i, kapitan Ulug‘bek Shukurllayev.

Mas’ul holat haqida qo‘shimcha ma’lumotlar berilishini bildirdi.