DTM nogironligi tasdiqlanmagan abituriyentlar masalasiga aniqlik kiritdi

Davlat test markazi direktori o‘rinbosari nogironligi tasdiqlanmagan abituriyentlarga murojaat bilan chiqdi.

Qayd etilishicha, abituriyentlar tomonidan “nogironligim tasdiqlangani to‘g‘risida nima sababdan menga SMS kelmadi?” degan murojaatlar ko‘p bo‘lmoqda.

Nogironligi bor bo‘lgan abituriyentlarning ma’lumotlari tekshirish uchun yuborilgan va hozirda tegishli tashkilot tomonidan tekshirilmoqda.

“Bu imtiyozni qayta tekshirishdan asosiy maqsad shundaki, nogironligi bo‘lmagan abituriyent nogironligim bor deb kiritgan bo‘lsa va u alohida kvotada qatnashib tavsiya etilgan taqdirda ham oliy ta’lim muassasasi uni o‘qishga qabul qilmaydi.

Shu sababli uni qayta tekshirish uchun yuborilgan.

Test sinovlarida ishtirok etish uchun nogironlikni tasdiqlangani yoki tasdiqlanmaganini aloqasi yo‘q, nogironligi tasdiqlangan abituriyentlar faqatgina tanlovda alohida kvotada ishtirok etadilar.

Nogironligi bor abituriyentlarning ma’lumotlari tasdiqlanib kelgandan so‘ng ularga SMS xabar yuboriladi”, — deyiladi xabarda.