4-avgust kuni Angliya banki AQSH Federal zaxira tizimi va Yevropa Markaziy bankidan so‘ng foiz stavkasini birdaniga 50 ta bazaviy punktga, yiliga 1,75 foizga ko‘tardi. Bu haqda “Kommersant” xabar bermoqda.
Bu so‘nggi 27 yil ichida ko‘rsatkichning eng sezilarli o‘sishi bo‘ldi. Shu tarzda regulyator inflyatsiyani jilovlashga harakat qilmoqda, yangi prognozga ko‘ra, to‘rtinchi chorakda narxlar o‘sishi 13,1 foizgacha tezlashadi.
Britaniya iqtisodiyotining yaqinlashib kelayotgan retsessiyasi fonida stavka ko‘tarildi — Angliya banki joriy yilning so‘nggi choragida retsessiya boshlanishini va 2023-yilda davom etishini kutmoqda.
Iyun oyida Buyuk Britaniyada gaz narxining tezlashishi fonida yillik inflyatsiya allaqachon 9,4 foizga yetdi.
Ikki hafta oldin Angliya banki rahbari Endryu Beyli regulyator qat’iy harakat qilishini aytgan edi.
Angliya Markaziy banki stavka bilan birgalikda 4-avgustda inflyatsiya prognozini oshirdi — bu ko‘rsatkich 2022-yilning to‘rtinchi choragida 13,1 foizni tashkil etadi.
Narxlarning keyingi o‘sishi sekinlashishi va 2023-yilda 5,5 foizni tashkil qilishi kutilmoqda.
Ikki yil ichida u 2 foiz maqsadli darajaga tushadi — Angliya banki o‘z prognoziga ko‘ra, inflyatsiya bosimi jahon tovarlari narxlarining barqarorlashuvi fonida asta-sekin zaiflashadi.
Izoh (0)