Samarqanddagi aeroportda alkogol mahsulotlari bilan “yashil yo‘lak”dan o‘tayotgan shaxs aniqlandi. Bu haqda viloyat bojxona boshqarmasi axborot xizmati xabar berdi.

Unga ko‘ra, Samarqand xalqaro aeroportiga Domodedovo–Samarqand yo‘nalishidagi aviareys bilan uchib kelgan fuqaro Z.X. “yashil yo‘lak” orqali bojxona nazoratidan o‘tayotganida unda tovarlarni bojsiz olib kirish normasidan ortiqcha yuk borligi ma’lum bo‘lgan.

Yo‘lovchining bagaj-sumkasida alkogol mahsulotlari bor bo‘lib, bojxona xodimlari tomonidan xolislar ishtirokida Z.X.ga tegishli taxminiy qiymati 6,2 million so‘mlik 9,5 litr spirtli ichimliklar rasmiylashtirilib olindi. Hozirda mazkur holat yuzasidan bojxona organlari tomonidan surishtiruv harakatlari davom ettirilmoqda.

Ma’lumot uchun, amaldagi qonunchilikka ko‘ra, jismoniy shaxslar bojxona chegarasi orqali bojxona to‘lovlarisiz umumiy miqdori 2 litrdan ko‘p bo‘lmagan alkogol mahsuloti, shu jumladan, pivo olib kirishlari mumkin.