Neft narxi 6 oydagi eng past darajaga tushganidan keyin ko‘tarilishni boshladi

Jahon bozorida neft narxi deyarli 6 oylik eng past darajaga tushganidan so‘ng qayta tiklanmoqda. Bu haqda Reuters xabar bermoqda.

Brent neftining fyucherslari 0,4 foizga oshib, bir barreli uchun 97,20 dollarni, West Texas Intermediate neftining fyucherslari oxirgi marta 0,5 foizga oshib, 91,15 dollarni tashkil qildi.

Ta’kidlanishicha, har ikkala ko‘rsatkich ham AQSH ma’lumotlari o‘tgan haftada xom neft va benzin zaxiralari kutilmaganda o‘sganini ko‘rsatganidan so‘ng, fevral oyidan beri eng past darajaga tushib ketgan.

Shuningdek, OPEK+ neft qazib olish maqsadini kuniga 100 ming barrelga oshirishga rozi bo‘lgani ham narx tushishiga o‘z hissasini qo‘shdi, bu global neft talabining taxminan 0,1 foizini tashkil qiladi.

Avvalroq neft gigantlari aprel—iyun oylarida rekord darajadagi 46 mlrd dollar foyda ko‘rgani haqida xabar berilgandi.