Andijonda 280 mln so‘m kredit mablag‘i va garovdagi ekskavatorni o‘zlashtirgan shaxslar ushlandi

Asaka va Marhamat tumanlarida kredit mablag‘ini va garovdagi mulkni o‘zlashtirgan firibgarlar aniqlandi.

Bosh prokuratura huzuridagi departamentning Asaka tuman bo‘limi tomonidan bank filialining murojaatiga asosan o‘tkazilgan tergovga qadar tekshiruvda, “T.Sh.” MCHJ rahbari I.M. va boshqalar rasmiy hujjatlarga soxta ma’lumotlar kiritish orqali tuman hududidagi tokzorni qayta rekonstruksiya qilish uchun ajratilgan 280 mln so‘m kredit mablag‘ini o‘zlashtirish yo‘li bilan talon-toroj qilganliklari aniqlangan.

Shu kabi, departamentning Marhamat tuman bo‘limi tomonidan o‘tkazilgan tergovga qadar tekshiruvda, fuqaro N.A. “A.A.” dehqon xo‘jaligiga tegishli kredit evaziga garovga qo‘yilgan “EW 140S” rusumli ekskavatorni 50 000 AQSH dollariga sotib, o‘zining shaxsiy ehtiyoji uchun sarflab yuborgani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.