Uzbekistan Airports kompaniyasi O‘zbekistondagi Duty Free do‘konlari uchun mas’ul bo‘lgan Central Asia Megastar MCHJning 23,3 foiz ulushini sotib oldi. Bu haqda “Daryo”ga bitim hujjatlaridan ma’lum bo‘ldi.
Sotuvchi Uzbekistan Airways bo‘ldi. Bitim summasi 400 344 000 so‘mni tashkil etdi.
O‘zbekistondagi Duty Free do‘konlarning asosiy egasi Premium Globe Investment MCHJ bo‘lib qolmoqda — unga kompaniyaning 51 foizi tegishli.
Bundan tashqari, Davlat aktivlarini boshqarish agentligi Central Asia Megastar MCHJning 25,6 foiziga egalik qiladi.
Bularning barchasi nimani anglatadi?
Uzbekistan Airports aeroportlarni rivojlantirishga kompleks yondashishga harakat qilmoqda.
Masalan, yaqinda kompaniya Toshkent aeroporti yaqinidagi, avvallari hokimlik balansida bo‘lgan hududni o‘z nazoratiga oldi.
Bu avtoturargohlarni avtomatlashtirish, aerovokzal oldidagi hududlarni qaytadan qulay loyihalashtirish, yo‘lovchilarni kutib oluvchilar va kuzatuvchilar uchun ko‘proq qulayliklar yaratish hamda o‘z yechimini kutayotgan taksi xizmati bilan bog‘liq muammolarni hal qilish imkonini beradi.
Izoh (0)