“Tolibon” qo‘mondonlaridan biri Tojikistonni agar Afg‘oniston ichki ishlariga aralashishni bas qilmasa, bir hafta ichida bosib olishlari mumkinligi haqida ogohlantirdi, deb yozadi Asia Plus Afg‘onistonning “Xashte subx” gazetasiga tayanib.
2-avgust kuni ushbu gazetaning Toxar viloyatidagi mahalliy manbasi ma’lum qilishicha, toliblarning “Omari” 217-armiya korpusi qo‘mondoni o‘rinbosari mulla Jan Muhammad Hamza “Tolibon” hukumatining Taxorda tashrif bilan bo‘lib turgan vazirlaridan birining oldida shunday bayonot qilgan.
“Toliblar korpusi qo‘mondoni o‘rinbosari Dushanbeni ogohlantirdi, agar Tojikiston Afg‘onistonning ichki ishlariga aralashishni bas qilmasa, Rossiya esa Tojikistonni qo‘llab-quvvatlab uning orqasida turmasa, unda toliblar bu mamlakatni bir hafta ichida egallab oladi”, — deya ma’lum qildi gazeta manbasi.
Tojikiston hukumati mulla Janning bayonoti yuzasidan izoh berganicha yo‘q.
Bu “Tolibon”ga yaqin shaxslar Tojikistonni Afg‘onistonning ichki ishlariga aralashmaslik haqida ogohlantirishi bilan bog‘liq birinchi holat emas.
Avvalroq Afg‘oniston sobiq bosh vaziri va mamlakatdagi Islom partiyasi asoschisi Gulbiddin Hikmatyor Tojikiston “afg‘on muxolifatiga boshpana taqdim etish orqali, Afg‘onistonga urush e’lon qildi”, — degan edi.
Hikmatyorning bu bayonoti “Tolibon” hukumatining rasmiy shaxslari tomonidan ochiqdan-ochiq qo‘llab-quvvatlangani yo‘q.
“Tolibon” vakili Zabihullo Mujohid Afg‘onistondan qo‘shni mamlakatlarga hujumlarga yo‘l qo‘ymasliklari haqida bir necha marta aytib o‘tgan.
Afg‘onistonda hokimiyat tepasiga toliblar kelganidan buyon Tojikiston ular bilan hech qanday aloqalar o‘rnatgani yo‘q, u barcha ozchiliklarlarning talablari va inson huquqlariga rioya qilgan holda inklyuziv hukumat tuzilishini yoqlab kelmoqda.
Taxmin qilinishicha, “Afg‘onistonning ichki ishlariga aralashuv” deganda “Tolibon” Tojikistonning aynan shu pozitsiyasini nazarda tutmoqda.
Izoh (0)