O‘zbekistonda ilk bor xavfli suyak o‘smasiga chalingan bolada noyob endoprotezlash amaliyoti bajarildi

Sog‘liqni saqlash vazirligi matbuot xizmatining ma’lum qilishicha, ilk bor xavfli suyak o‘smasiga chalingan 14 yoshli o‘smirda noyob endoprotezlash amaliyoti bajarildi.

Qayd etilishicha, so‘nggi paytlarda dunyo aholisi orasida onkologik xastaliklar bilan kasallanish ko‘rsatkichi tobora ortib bormoqda. Ma’lumotlarga ko‘ra, 2030-yilga kelib, jahonda xavfli saraton kasalliklariga chalingan bemorlar soni 23,6 millionga yetadi.

O‘zbekistonda ham bu kasallik tashxisi qo‘yilgan bemorlar soni kam emas. Xususan, mamlakatda har yili ko‘plab insonlarda ushbu xastalik aniqlanadi. Ularning 900 nafardan ortig‘i xavfli suyak o‘sma kasalliklariga chalingan bemorlar bo‘lib, bunda bolalarning ulushi 7 foizni tashkil qiladi.

Farg‘ona viloyati Qo‘qon shahrida yashovchi 14 yoshli M.A. ana shu xastalikni boshidan o‘tkazgan. Yaqinlarining aytishicha, so‘nggi tibbiy tekshiruvlardan so‘ng unga xavfli suyak o‘smasi tashxisi qo‘yilgan. Shundan so‘ng bemorning ota-onasi Respublika ixtisoslashtirilgan onkologiya va tibbiy radiologiya ilmiy-amaliy tibbiyot markaziga murojaat qilgan. Ushbu markazda ilk bor rossiyalik va mahalliy shifokorlar hamkorligida mazkur bemorda o‘suvchi endoprotezlash amaliyoti o‘tkazildi.

Bu operatsiya chap son suyagi pastki uchligi sohasining rivojlangan xavfli o‘sma kasalligida tizza-bo‘g‘inni endoprotezlash amaliyoti hisoblanadi. To‘g‘ri, shu paytga qadar yurtimizning qator tibbiyot muassasalarida shunga o‘xshash operatsiyalar o‘tkazilgan, biroq bugungi jarrohlik amaliyotining farqli tomoni, unda bemorga o‘rnatilgan endoprotez cho‘zilish xususiyatiga ega. Ya’ni uning afzalligi operatsiyadan keyin moslamani uzaytirish imkoni mavjud, — deydi Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi bo‘lim boshlig‘i Tojiddin Mustafoyev.