Andijon viloyatining Bo‘ston tumani maktabgacha ta’lim bo‘limi mansabdorlari ustidan jinoyat ishi ochildi. Bu haqda “Daryo”ga viloyat prokuraturasi axborot xizmati ma’lum qildi.
Aniqlanishicha, davlat bog‘chalariga ta’minotchilik qilgan tadbirkor o‘z joniga qasd qilgani to‘g‘risidagi xabar e’lon qilingach, Bo‘ston tumani prokuraturasi tuman maktabgacha ta’lim bo‘limida yo‘l qo‘yilgan qonunbuzilish holatlari yuzasidan tekshiruv o‘tkazgan.
Tekshirish davomida tuman maktabgacha ta’lim bo‘limi hamda maktabgacha ta’lim tashkilotlari mansabdor shaxslari tomonidan o‘zganing juda ko‘p miqdordagi mulklarni o‘zlashtirish yo‘li bilan talon-toroj qilingani aniqlangan.
Mazkur holat yuzasidan ularga nisbatan Jinoyat kodeksining 167-moddasi 3-qismi “a” (o‘zlashtirish yoki rastrata yo‘li bilan talon-toroj qilish) bandi bilan jinoyat ishi qo‘zg‘atilib, hozirda tergov harakatlari olib borilmoqda. Jinoyat ishi bo‘yicha tergov harakatlari viloyat prokuraturasi tomonidan nazoratga olingan.
“Daryo” muxbiri tadbirkorning o‘limi bilan bog‘liq voqealarga aniqlik qiritish maqsadida marhumning singlisi, MCHJ ta’sischisi Nargizaxon Sattarova bilan suhbatlashgandi. Uning ta’kidlashicha, bog‘chalarning marhumdan 600 million so‘mdan ortiq qarzi bo‘lgan. Mablag‘larning qaytarilishidan umidini uzgan akasi ishi to‘xtab qolmasligi uchun bankdan kredit olgan. Maktabgacha ta’lim vazirligi axborot xizmati rahbari Mavluda Asqarxo‘jayeva ham ushbu holat yuzasidan videobayonot berib, tuman maktabgacha ta’lim bo‘limi tomonidan MCHJ hisobiga 925,6 million so‘m mablag‘ o‘tkazib berilgani ma’lum qilgandi.
Izoh (0)