Qozonning “Rubin” jamoasi “Bunyodkor” futbolchisi Umarali Rahmonaliyevga qiziqish bildirmoqda.
Rossiya klubi 18 yoshli futbolchi uchun rasmiy taklif yuborgan. “Rubin” Rahmonaliyev uchun 50 ming dollar to‘lamoqchi bo‘lgan, ammo “qaldirg‘ochlar” rahbariyati bu so‘rovni darhol rad etib, muzokara o‘tkazish uchun jiddiyroq taklif yuborishni so‘ragan, deya xabar beradi “Championat.asia” internet nashri.
Metaratings nashriga ko‘ra, “Bunyodkor” Umarali uchun 1 million dollar talab qilgan. Rahmonaliyevning o‘zi “Rubin”ga o‘tishga qarshi emas. Uning “qaldirg‘ochlar” bilan shartnomasi yil yakunida o‘z nihoyasiga yetadi. Agarda klub futbolchining ketishiga qarshilik qiladigan bo‘lsa, Umarali shartnomani bir tomonlama bekor qilishi va erkin agent sifatida Qozon klubi safiga o‘tib ketishi mumkin.
PFL bosh direktori Diyor Imomxo‘jayev Umarali Rahmonaliyev atrofidagi voqealarga o‘z munosabatini bildirdi.
Bizdagi ma’lumotga ko‘ra, “Rubin” futbolchi uchun 50 ming dollar bermoqchi. Unga Leonid Slutskiyning o‘zi qiziqib qolgan, bu muhim jihat. Futbolchining shartnomasi 2022-yil so‘ngida yakuniga yetishini inobatga olsak, u kelasi mavsum “Bunyodkor”ni erkin agent sifatida tark etishi mumkin. Shundan kelib chiqib, savdoni aqlga sig‘adigan darajada olib borish to‘g‘riroq. Unga “Rubin” bosh murabbiyining o‘zi qiziqib qolgan bo‘lsa, klub savdoni 100-150 ming dollargacha ham ko‘tarishi mumkin. O‘zbekiston klubi uchun bu yomon narx emas.Umarali Rahmonaliyev 2022-yilgi mavsum Superligada 13 ta o‘yinda maydonga tushib, 6 ta golga mualliflik qilgan. Transfermarket futbolchini 200 ming yevroga baholamoqda.Chunki, transfer narxidan tashqari “Bunyodkor” “Rubin”dan mashg‘ulot kompensatsiyasi ham talab qiladi. “Rubin” Rossiya quyi divizionida ekani hamda Rahmonaliyev “Bunyodkor” akademiyasida 2015-yildan buyon qayd etib kelinayotgani inobatga olinsa, “qaldirg‘ochlar” shuning o‘zigayoq, taxminan, yana 130 ming dollar talab qilishga haqli. Demak, buning yoniga transfer puli ham qo‘shilsa, 18 yoshli futbolchi uchun yomon narx chiqmaydi. Qo‘shimchasiga, “Bunyodkor” “Rubin” bilan futbolchining ehtimoliy keyingi transferidan ma’lum foizini olish bo‘yicha ham kelishuv imzolasa bo‘ladi.
Diyor Imomxo‘jayev, PFL bosh direktori
“Rubin” 2021/22-yilgi mavsum yakunlariga ko‘ra RPLni tark etgandi. Jamoa ayni vaqtda Rossiya birinchi ligasida harakat qilmoqda.
Izoh (0)