O‘z-o‘zini mustaqil deb e’lon qilgan Kosovoda xavfsizlikni ta’minlash uchun mas’ul bo‘lgan NATO rahbarligidagi xalqaro kuchlar (KFOR) Kosovo barqarorligiga nisbatan xavf tug‘ilgan taqdirda, Belgrad va Prishtina o‘rtasidagi chegara nizosiga aralashishga tayyor. Bu haqda tashkilotning Twitter’dagi bayonotida aytiladi.
“Agar Kosovo shimolida barqarorlik xavf ostida qolsa, KFOR aralashishga tayyor”, — deyiladi xabarda.
Tashkilot qayd etishicha, Kosovo shimolidagi hududlarda xavfsizlik bilan bog‘liq vaziyat keskin bo‘lib qolmoqda, ammo KFOR doimiy kuzatuv olib bormoqda va BMT Xavfsizlik kengashining 1999-yilgi 1244-rezolyutsiyasi doirasida aralashishga tayyor. “NATO rahbarligi ostidagi KFOR missiyamiz BMTning butun Kosovo aholisi uchun xavfsiz sharoitlar va harakatlanish erkinligini ta’minlash bo‘yicha o‘z mandatini kundalik bajarishiga qaratilgan”, — deyiladi xabarda.
Kosovo Force (KFOR) — NATO boshchiligidagi xalqaro missiya bo‘lib, qisman tan olingan respublikadagi barqarorlik uchun javob beradi. 1999-yildan buyon faoliyat olib boradi.
31-iyul kuni kechqurun Prishtinaning serb hujjatlarini tan olmaslik haqidagi qarori fonida Kosovo shimolida vaziyat keskinlashdi, odamlar barrikadalar qura boshladi, o‘q ovozlari eshitildi. Shunda Serbiya prezidenti Aleksandr Vuchich Kosovo yarim tunga yaqin kosovolik serblarga qarshi operatsiya boshlamoqchiligini aytdi.
Vaziyat yomonlashuvi fonida Vuchich Serbiya Bosh shtabiga yetib keldi, Kosovo hukumati esa mamlakatning shimoliy tumanlarida politsiyani safarbar etdi.
Bosh shtabdagi yig‘ilish yakunlariga ko‘ra, Vuchich xalqaro hamjamiyatni Kosovo hukumatiga ta’sir o‘tkazishga chaqirdi va vaziyat tez orada hal bo‘lishiga umid bildirdi.
Kosovo hukumati Serbiya bilan chegarada vaziyatning keskinlashuviga sabab bo‘lgan, qisman tan olingan respublika hududida serb hujjatlarining amal qilishini to‘xtatish to‘g‘risidagi qonun qabul qilinishini 1-sentabrgacha kechiktirish haqidagi qarorini e’lon qildi.
Ilgari Kosovo Serbiya tarkibidagi muxtor respublika bo‘lgan, ammo 2008-yilda o‘zini mustaqil deb e’lon qilgan. Uni Yevroittifoq mamlakatlarining aksariyati va BMTga a’zo davlatlarning yuzdan ortig‘i tan olgan. Rossiya, Xitoy, Eron, Serbiya va boshqa bir qator mamlakatlar Kosovoni alohida davlat sifatida tan olmagan.
Izoh (0)