Buxorodagi tibbiyot texnikumiga fuqaroni 1,5 ming dollar evaziga o‘qishga kiritib qo‘ymoqchi bo‘lgan shaxs ushlandi

Buxorodagi tibbiyot texnikumiga o‘qishga kiritib qo‘yishni va’da qilgan shaxs qo‘lga olindi.

Buxoroda huquqni muhofaza qiluvchi idoralar tomonidan o‘tkazilgan tezkor tadbir davomida Romitan tumanida yashovchi, 1979-yilda tug‘ilgan E.N. ismli shaxs M.H.ni Buxoro shahridagi Abu Ali ibn Sino nomidagi jamoat salomatlik texnikumiga vakolatli tanishlari orqali o‘qishga kiritib qo‘yish evaziga 1500 AQSH dollari miqdoridagi pullarni so‘ragan.

U oldindan kimyoviy ishlov berilgan 400 AQSH dollarini olgan vaqtida daliliy ashyolar bilan jinoyat ustida ushlangan.

Mazkur holat yuzasidan E.N. ga nisbatan Jinoyat kodeksining 168-moddasi 1-qismi va 211-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.