Afg‘onistonning 2021-yil uchun yetkazib berilgan elektr energiyasidan qarzdorligi mavjud emas. 2022-yilda ham to‘lovlarni amalga oshirib kelmoqda, deb xabar berdi Energetika vazirligi matbuot xizmati.
Qayd etilishicha, 2021-yilda Afg‘onistonga 2 million 151,3 ming kVt.soat elektr energiyasi yetkazib berilgan bo‘lib, Da Afghanistan Breshna Sherkat energetika kompaniyasi tomonidan elektr energiyasi uchun to‘lovlar to‘liq amalga oshirilgan. Ya’ni 2021-yil uchun Afg‘onistonning elektr energiyasidan qarzdorligi mavjud emas.
“O‘zbekiston milliy elektr tarmoqlari” AJ va Da Afghanistan Breshna Sherkat kompaniyasi o‘rtasidagi shartnomaga ko‘ra, Afg‘onistonga 2022-yilda 2 million 210 ming kVt.soat elektr energiyasi yetkazib berish belgilangan bo‘lib, yanvar—iyun oylarida Afg‘onistonning elektr energiyasiga bo‘lgan talab va ehtiyojidan kelib chiqqan holda 770,2 million kVt.soat elektr energiyasi yetkazib berildi.
Bugungi kunda yetkazib berilgan elektr energiyasi uchun to‘lovlar kompaniya tomonidan doimiy ravishda amalga oshirilmoqda. Yozgi mavsumda Afg‘oniston Tojikiston energetika tizimiga ulanishi sababli 14-apreldan O‘zbekistondan elektr energiyasini qabul qilish to‘xtagan.
Ma’lumot uchun, 2002-yildan boshlab O‘zbekistondan Afg‘onistonga elektr energiyasi yetkazib borilmoqda. Dastlabki yillarda 10 kV kuchlanishli elektr uzatish tarmoqlaridan texnologik imkoniyatlaridan kelib chiqqan holda Da Afghanistan Breshna Sherkat (DABS) kompaniyasi bilan tuzilgan shartnomalar bo‘yicha elektr energiyasi yetkazib berilgan.
2009-yilda ikkita 220 kV kuchlanishli elektr uzatish tarmog‘i qurilishi yakunlanib ishga tushirilganidan so‘ng Afg‘onistonga 430 MVtgacha quvvatda elektr energiyasi yetkazib berilmoqda.
Izoh (0)