Rossiya tashqi ishlar vaziri va AQSH davlat kotibi urush boshlanganidan buyon birinchi marta telefon orqali suhbatlashdi

Rossiya tashqi ishlar vaziri Sergey Lavrov va AQSH davlat kotibi Entoni Blinken urush boshlanganidan buyon birinchi marta telefon orqali suhbatlashdi. Qo‘ng‘iroqlashuv haqida Blinken ma’lum qildi, deb yozadi Meduza.

“Suhbat dangal va ochiqchasiga kechdi. Men Kremlni Pol Uilan va Brittni Graynerni ozod etish bo‘yicha taklifimizni qabul qilishga chaqirdim. Shuningdek, dunyo Rossiyadan Ukraina, Turkiya va BMT bilan Ukrainadan don yetkazish bo‘yicha erishilgan bitimga oid majburiyatlar bajarilishini kutayotganini ta’kidladim”, — dedi Blinken.

“Kreml tomonidan yaqinda e’lon qilingan Ukraina hududini istilo qilishni davom ettirish rejalari haqidagi bayonot hamda shaxsan vazirning Ukrainaning demokratik tarzda saylangan hukumatini almashtirish Rossiya rejalariga kirishi haqidagi gaplari fonida, Lavrovga bu rejalar dunyo hamjamiyati tomonidan hech qachon qabul qilinmasligini bildirdim. Dunyo hech qachon istiloni tan olmaydi. Agar Rossiya bu rejalarni amalga oshirsa, biz Rossiyaga qo‘shimcha jiddiy sanksiyalar yuklaymiz”, — deya qayd etdi AQSH davlat kotibi.

Rossiya Tashqi ishlar vazirligi ma’lum qilishicha, Lavrov Blinken bilan suhbatda Rossiya “maxsus harbiy operatsiyasi”ning “maqsad va vazifalari to‘liq bajarilishi”ni qayd etdi, shuningdek, oziq-ovqat eksporti bilan bog‘liq vaziyat “Amerika sanksiyalari tufayli murakkablashayotgani”ni ta’kidladi.

“Davlat kotibining e’tibori shunga qaratildiki, Ukraina qurolli kuchlari va milliy batalyonlarning Amerika va NATO qurollari bilan ta’minlanishda davom etishi va ularning tinch aholiga qarshi keng ko‘lamda qo‘llanilishi Kiyevda agoniya rejimini uzaytirib, nizoni cho‘zmoqda va qurbonlarni ko‘paytirmoqda”, — deyiladi xabarda.

“Rossiya va AQSHning hibsga olingan fuqarolari bilan ehtimoliy ayirboshlash masalasida Rossiya tomoni quruq muhokamalarga asoslangan axborot sizib chiqishiga yo‘l qo‘ymagan holda, “tinch diplomatiya” rejimidagi professional muloqotni qat’iy taklif qildi”, — deya qayd etdi Rossiya TIV.

Ma’lumot uchun, avvalroq AQSH Rossiyaga josuslik haqidagi modda bo‘yicha Rossiyada sudlangan Pol Uilan va narkotiklar kontrabandasi bo‘yicha sudlangan basketbolchi Brittni Graynerni AQSHda noqonuniy qurol yetkazib berish ayblovi bo‘yicha 25 yilga hukm qilingan Viktor Butga ayirboshlashni taklif qilgan.

Rossiya TIV Moskva va Vashington o‘zlarining hibsdagi fuqarolarini ayirboshlash bo‘yicha muzokaralar olib borayotgani, biroq hozircha aniq bir natijalar yo‘qligini qayd etgandi.

Iyun boshida AQSH prezidenti Jo Bayden Ukrainaga HIMARS baravar o‘t ochish reaktiv tizimlarini yetkazib berish qarori haqida e’lon qildi. Iyul boshida Ukraina Qurolli kuchlari bosh qo‘mondoni Valeriy Zalujniy qurolli kuchlar ularni qo‘llashni boshlaganini ma’lum qildi.

Ukraina mudofaa vaziri Aleksey Reznikning so‘zlariga ko‘ra, mamlakat “sinovdan o‘tdi” va AQSH yetkazib bergan artilleriya tizimlarini muvaffaqiyatli qo‘llamoqda. U shuningdek, yangi zirhli texnika va uchuvchisiz uchar qurilmalar yetkazib berilishi zaruriyatini qayd etdi.

Ukraina prezidenti Vladimir Zelenskiy mamlakat G‘arbdagi sheriklaridan so‘rayotgan qurollarni vaksinaga qiyosladi.

Rossiya prezidenti Vladimir Putin Ukraina tomoniga raketa qurol-yarog‘lari topshirilishi haqida gapirar ekan, “bu dahmazalar”ning barchasidan ko‘zlangan maqsad “qurolli nizoni iloji boricha uzoqroq cho‘zish” ekanini aytgandi.