Qozog‘iston Rossiyadan uzoqlashish, Yevropa va AQSH bilan munosabatlarni mustahkamlash yo‘lidan bormoqda. Bu fikr Modern Diplomacy platformasidagi “Ayiq quchog‘idan qochish” maqolasida keltirilgan.
Unda yozilishicha, Qozog‘iston yanvar voqealari hamda Rossiya va Ukraina o‘rtasidagi urushdan saboq olgan. Mamlakat o‘z armiyasini mustahkamlab, mudofaa zavodlarini qurmoqda va qurol sotib olishda Rossiyaning ta’sirini kamaytirmoqda.
Novorossiysk sudi Kaspiy quvurlari konsorsiumi faoliyatini to‘xtatib turish to‘g‘risidagi qaroridan so‘ng Qozog‘iston prezidenti Qosim-Jo‘mart To‘qayev neftni tashishni diversifikatsiya qilish masalasini ko‘tardi. U Yevropa Ittifoqi Qozog‘istonga muqobil yo‘laklarni, jumladan, Xitoydan Yevropaga Markaziy Osiyo, Kavkaz va Turkiya orqali o‘tuvchi va Rossiyani chetlab o‘tuvchi Transkaspiy xalqaro transport yo‘lagini rivojlantirishda yordam berishiga umid qilmoqda.
Maqolaga ko‘ra, Yevropaning Markaziy Osiyoga qiziqishi ortib bormoqda. Vashington ham mintaqaga e’tiborni kuchaytira boshladi. Qo‘shma Shtatlar Rossiya ta’siriga qarshi turish va Qozog‘istonning Moskva nazoratidagi quvurlarga qaramligini kamaytirish, iqtisodiyotni isloh qilish, Xitoy va Rossiya ta’sirini cheklash uchun Qozog‘istonning qo‘shni Markaziy Osiyo davlatlari bilan ishlarni muvofiqlashtirishida yordam beradi.
Izoh (0)