Ispaniyada bir kishi maymunchechakdan vafot etdi, bu Yevropada qayd etilgan ushbu infeksiya oqibatidagi birinchi o‘limdir, deb yozadi “Interfaks”.
Milliy epidemilogik nazorat tarmog‘i ma’lumotlariga ko‘ra, Ispaniyada 29-iyul holatiga 4298 kishida maymunchechak tasdiqlangan. Ispaniya tasdiqlangan holatlar soni bo‘yicha dunyoda AQSHdan keyingi ikkinchi o‘rinda turadi. La Vanguardia nashri yozishicha, kasallanganlar haqidagi ma’lumotlar odatda kechikib yetib keladi.
Ispaniya Sog‘liqni saqlash vazirligi aniqlik kiritishicha, maymunchechakka chalingan 135 nafar bemorda asoratlar yuzaga kelgan. 120 bemor kasalxonaga yotqizilgan, ulardan biri vafot etgan.
O‘lim holati Valensiyada qayd etilgan. Dastlabki ma’lumotlarga ko‘ra, bemor birlamchi infeksiya oqibatida yuzaga kelgan ensefalit tufayli vafot etgan.
Shuningdek, Braziliya Sog‘liqni saqlash vazirligi ham mamlakatda maymunchechak oqibatidagi ilk o‘lim holatini tasdiqladi.
Minas-Jerays shtati, Uberlandiya shahrida vafot etgan bemorning immuniteti past bo‘lgan.
Vazirlikning so‘nggi ma’lumotlariga ko‘ra, Braziliyada 978 kishida ushbu kasallik aniqlangan, shularning uch nafari bolalar, ikki nafari esa o‘smirlardir. Holatlarning aksariyati San-Paulu shtatida qayd etilgan.
Izoh (0)