Yaponiya poytaxti Tokioda 28-iyul kuni O‘zbekiston delegatsiyasining Otaru tijorat universitetining vitse-prezidentlari Ichiro Saito va Masafumi Suzuki bilan uchrashuv bo‘lib o‘tdi, deb xabar bermoqda Dunyo axborot agentligi.
Muzokaralar chog‘ida o‘zbek diplomatlari Otaru tijorat universiteti va O‘zbekiston oliy o‘quv yurtlari o‘rtasida hamkorlikni yo‘lga qo‘yishning amaliy masalalarini muhokama qilgan. Xususan, o‘zbek tadqiqotchilari va talabalari uchun mazkur yapon universiteti o‘qituvchilarining ma’ruza hamda onlayn mashg‘ulotlarini tashkil etish taklif etilgan. Shuningdek, Otaru tijorat universiteti vakillari joriy yil sentabr oyida Sukuba universitetida bo‘lib o‘tadigan O‘zbekiston–Yaponiya rektorlarining 4-forumida ishtirok etishga taklif qilingan.
Mazkur universitet vitse-prezidenti Ichiro Saito O‘zbekiston–Yaponiya rektorlari forumida qatnashishga hamda O‘zbekistonning oliy ta’lim muassasalari, jumladan, Toshkent davlat iqtisodiyot universiteti bilan o‘zaro hamkorlikni o‘rnatish masalasini muhokama etishga tayyor ekanligini ma’lum qilgan.
Izoh (0)