Kolumbiya va Venesuela ko‘p yillik keskinlikdan keyin munosabatlarni qayta tiklashga tayyorligini e’lon qildi, deb yozadi Tengrinews.
Venesuela tashqi ishlar vaziri Karlos Faria va Kolumbiyaning saylangan tashqi ishlar vaziri Alvaro Leyva Venesuelaning chegaraga tutash San-Kristobal shahrida qo‘shma bayonot berdi. Vazirlar qayd etishicha, Kolumbiyaning yangi prezidenti Gustavo Petro 7-avgust kuni lavozimiga kirishganidan keyin Venesuela bilan diplomatik aloqalarni qayta tiklashga shayligini ma’lum qilgan.
“Ikkala taraf ham 7-avgustdan boshlab elchilar hamda diplomatik va konsullik ishchilarini tayinlash yo‘li bilan ikki tomonlama munosabatlarning asta-sekinlik bilan normallashuvini ko‘rishni istaydi”, — deyiladi Kolumbiya tashqi ishlar vaziri xabarida.
Faria tasdiqlashicha, kun tartibidagi bandlardan biri chegaraning “bosqichma-bosqich ochilishi”ni o‘z ichiga olgan. Kolumbiya va Venesuela katta masofaga cho‘zilgan umumiy chegaraga ega bo‘lib, u uzoq vaqtlar davomida ELN va FARC kabi qurolli guruhlar uchun boshpana bo‘lib kelgan.
Kolumbiya va Venesuela o‘rtasidagi aloqalar 2015-yilda, muhojirlar inqirozi davrida buzilgan edi. 2019-yilda Kolumbiyaning lavozimini tark etayotgan prezidenti Ivan Duke Venesuela yetakchisi Nikolas Maduroning saylanganini tan olishdan bosh tortib, Karakas bilan aloqalarni butunlay uzib yuborgan edi. Ikkala mamlakatda ham elchixona va konsulxonalar yopilib, ular o‘rtasidagi aviareyslar to‘xtatildi. Chegaraning o‘zi 2019-yildan 2021-yil oxirigacha yopiq bo‘lib kelgan.
Eslatib o‘tamiz, 24-iyun kuni Kolumbiya birlashgan so‘l kuchlar nomzodi Gustavo Petro rasman respublikaning saylangan prezidentiga aylandi. Petro amalga oshirishni rejalashtirayotgan siyosiy qarorlar orasida Kolumbiyada neft qazib olishni to‘xtatish, toza energiya bilan ishlaydigan qishloq xo‘jalik biznesiga yuklamani kamaytirishga qaratilgan soliq islohoti, davlat tomonidan xususiy pensiya jamg‘armalari pullaridan foydalanish va boshqalar bor.
Izoh (0)