O‘zbekistonda profilaktik ro‘yxatda turgan ayollar sog‘lom hayotga qaytarilmoqda. Bu haqda 27-iyul kuni Oliy Majlis Senatida bo‘lib o‘tgan xotin-qizlar va gender masalalariga bag‘ishlangan majlisda bosh vazir o‘rinbosari, oila va xotin-qizlar davlat qo‘mitasi raisi Zulayho Mahkamova aytib o‘tdi, deya xabar bermoqda “Daryo” muxbiri.
Zulayho Mahkamovaning ma’lum qilishicha, 23 mingdan ziyod profilaktik hisobda turgan ayollarning uylariga borib, ularni sog‘lom hayotga qaytarish ishlari olib borilgan.
“Hozir 9 ming 700 nafarini profilaktik hisobdan chiqardik. Ularning qo‘ni-qo‘shnilari, oilasini borib o‘rgandik. Ular jinoyatga aloqadorligi uchun yoki qachondir ro‘yxatga tushgan. Bugun ro‘yxatdan chiqarilganlar sog‘lom hayotda yashayotganligi, mana shu jarayondan chiqqanligidan o‘zi ham xursandligini ko‘rdik. Yana sog‘lom hayotga qaytadigan 9 mingdan ortiq mana shunday ayollarimizning har bittasini ro‘yxatdan chiqarish rejalashtirilmoqda”, — dedi bosh vazir o‘rinbosari.
Eslatib o‘tamiz, 2019-yil avgustida Toshkentda xotin-qizlarning 23 ta toifa bo‘yicha kartotekalari shakllantirilishi haqida xabarlar tarqalgan edi — ro‘yxatda, jumladan, uzoq vaqt chet elda bo‘lgan ayollar, ishsiz va vaqtinchalik propiskali xotin-qizlar kabi toifalar ham bor edi.
Ro‘yxat jamoatchilikning keskin noroziligiga sabab bo‘lgan, Demokratiya va inson huquqlari instituti ushbu ro‘yxat yuzasidan O‘zbekiston ichki ishlar vaziri va Toshkent shahar hokimi nomiga murojaat yo‘llagandi (shuningdek, bu ro‘yxat xonanda Lolaning “Sevgingni menga ayt 2” klipida ham qoralab chiqilgan).
Sobiq xotin-qizlar qo‘mitasi raisi Elmira Bositxonova “Ayollarning 23 toifasi ro‘yxati” tuzilishiga aloqasi yo‘qligini aytib o‘tgandi.
Andijon viloyatida ham 2019-yilning aynan avgustida Andijon shahar xalq ta’limi bo‘limi tasarrufidagi maktablarda ishlovchi 25-35 yoshdagi, turmushga chiqmagan va turmushidan ajragan ayollarning alohida ro‘yxati yuritilishiga oid ma’lumot paydo bo‘lgandi. Andijon shahar hokimligi shunday ro‘yxat haqiqatan ham borligi, u shahar Xalq ta’limi bo‘limi xotin-qizlar qo‘mitasi tomonidan tuzilgani, turmushga chiqmagan va oilasidan ajrashgan qizlarga moddiy-ijtimoiy yordam berish uchun shakllantirilganini bildirgandi.
Xalq ta’limi vazirligi va sobiq Xotin-qizlar qo‘mitasi bergan ma’lumotga ko‘ra, bu ro‘yxat Andijon shahar xalq ta’limi bo‘limi tomonidan viloyatdagi huquqni muhofaza qilish organlariga ishga qabul qilishda suhbatga chaqirish uchun tuzilgan bo‘lib, huquqni muhofaza qiluvchi organlarda ayol xodimlar, xususan, pedagoglar sonini oshirish maqsadida ishlab chiqilgan. Ro‘yxatda qayd etilgan ayollar roziligi olingan holda suhbatga yuborilgan, huquqni muhofaza qiluvchi organlarda ishlashni xohlamaganlar esa ro‘yxatdan o‘chirilgan va suhbatga chaqirilmagan.
Shuni ham qayd etish lozimki, O‘zbekistonda yuridik jihatdan “jinoyatga moyilligi bor ayol” degan tushuncha yo‘q. Qonunchilikda huquqbuzarlikka moyilligi borlar ikkiga — jinoiy va ma’muriy toifaga bo‘linadi. Birinchi toifaga jazoni ijro etish muassasalaridan qaytganlar, ichkilikka ruju qo‘yganlar, ruhiy kasallar, fohisha va fohishaxona saqlagan xotin-qizlar kiradi. Ikkinchi toifaga esa farzand tarbiyasiga salbiy ta’sir ko‘rsatuvchi ayollar mansub.
Izoh (0)