Qovurilgan tovuq filesi gulkaram, pomidor, qalampir va ismaloq bilan birga pishirilganda ajoyib ta’mni hosil qiladi. Bundan tashqari ushbu taom turli xil vitaminlarga boy hisoblanadi.
Kerakli masalliqlar:
- gulkaram — o‘rtacha 1 bosh
- tovuq filesi — 450 g
- pomidor — 3 dona
- piyoz — 1 dona
- sabzi — o‘rtacha kattalikdagi 1 ta
- bulg‘or qalampiri — 1 donaning yarmi
- sarimsoq — 2-3 dona
- ismaloq — 1 bog‘
- o‘simlik yog‘i — 2 qoshiq
- karri — 1 qoshiqning yarmi yoki undan ortiq
- kashnich — yarim qoshiq
- murch — ta’bga ko‘ra
- suv — 200-300 ml
- tuz — ta’bga ko‘ra
- Gulkaramni gulbarglarga ajratib oling. Tovuq filesini o‘rta bo‘laklarga, pomidor, piyoz, sabzi va bulg‘or qalampirini mayda bo‘laklarga bo‘lib kesib oling. Sarimsoqni pichoq bilan maydalang. Ismaloqni ham mayda qilib to‘g‘rang.
- O‘simlik yog‘ini qizdirib tovuq filesini qovurib oling va uni boshqa idishga soling.
- Tovuq filesi qovurilgan idishga piyozni qo‘shib yumshaguncha qovuring va ustidan sarimsoqni qo‘shib 30 soniya davomida pishirib oling.
- Piyoz, sarimsoqning ustiga sabzi va bulg‘or qalampirini soling va uni 3-4 daqiqa qovuring.
- Uning ustiga pomidorni solib bir necha daqiqa davomida pishiring.
- Tovuq bo‘laklarini sabzavotlar pishirilayotgan idishga qaytarib soling va unga gulkaram qo‘shing. Keyin karri, kashnich va murch qo‘shib aralashtiring. Ustiga iliq suv quying va pishiring.
- Issiqlikni minimal darajaga tushiring va taxminan 25 daqiqa davomida idish qopqog‘ini yopib dimlab pishiring. Tayyor bo‘lishidan 5 daqiqa oldin tuz qo‘shing.
- Ismaloqni ham o‘sha idishga soling. Uni barglari so‘liguncha aralashtiring va yana bir necha daqiqa pishiring.
Mavzuga doir:
Izoh (0)