O‘zbekistonda 23—26-iyul kunlari ilk bor davlat oliy ta’lim muassasalariga o‘qishga kirish uchun chet tilidan 4 ta ko‘nikma bo‘yicha kasbiy (ijodiy) imtihonlar o‘tkazildi. Bu haqda Davlat test markazi xabar qildi.
Qayd etilishicha, Imtihonlar abituriyentlarga qulay bo‘lishi uchun barcha hududlar (Qoraqalpog‘iston Respublikasi, viloyatlar va Toshkent shahri)da tashkil etilgan va abituriyentlar o‘zlari tanlagan hududda imtihonlarda ishtirok etgan. Imtihonlar 2 bosqichda tashkil etilib, uning:
- 1-bosqichi (yozma qismi) 23—25-iyul kunlari qog‘oz shaklda;
- 2-bosqichi esa 24—26-iyul kunlari elektron tarzda bo‘lib o‘tgan.
Imtihonlar 11 ta chet tili — ingliz, nemis, fransuz, ispan, xitoy, koreys, yapon, hind, turk, arab va fors tillari bo‘yicha tashkil etildi va chet tillarni bilishning B1 darajasi bo‘yicha bo‘lib o‘tgan.
Imtihon natijalarini hisoblash oliy ta’lim muassasalarining bakalavriat ta’lim yo‘nalishlariga kirish test sinovlariga qadar yakunlanadi va natijalar abituriyentlarning shaxsiy kabinetida e’lon qilinadi.
Qo‘shimcha ma’lumot: chet tilidan B2 va undan yuqori darajadagi milliy yoki xalqaro sertifikatga ega abituriyentlar chet tilidan imtihon topshirmaydi. Ularga chet tili fanidan imtihonlarsiz maksimal ball beriladi.
Izoh (0)