Namangan shahridagi “Afsonalar vodiysi” bog‘ida qo‘l jangi bo‘yicha Prezident kubogi uchun xalqaro musobaqa bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
O‘ziga xos yorqin shou tarzida tashkillangan turnirda Rossiya, Qozog‘iston, Belarus, Germaniya va Ozarbayjondan kelgan sportchilar ishtirok etdi.
Musobaqada qo‘l jangi bo‘yicha xalqaro federatsiya vakillari Namangan viloyati hokimi Shavkat Abdurazzaqovga turnirni tashkil etishdagi sa’y-harakatlari uchun minnatdorlik bildirib, tashakkurnoma va ramziy qora kamar taqdim etdi.
“Afsonalar vodiysi” tatamilarida kechgan bellashuvlarning barchasida o‘zbekistonliklarning qo‘li baland keldi.
Shirin Zohidova, Ma’suma Mo‘minova, Husniddin Sattorov, Javohir Sobitov, Olim Normurodov va Jahongir Jumayev raqiblaridan ustun ekanliklarini yaqqol isbotladi.
Musobaqa g‘oliblari va sovrindorlariga tashkilotchilar tomonidan pul mukofotlari, esdalik sovg‘alari topshirildi.
Kecha davomida o‘zbek estradasi vakillari ishtirokida gala-konsert ham bo‘lib o‘tdi. Ushbu konsert davomida tomoshabinlar Yodgor Mirzajonov, Shirin Abdullayeva va “Benom” guruhining chiqishlarini kuzatdi.
Mavzuga doir:
Izoh (0)