O‘zbekistonda vabo kasalligi aniqlangani haqidagi xabarlar yolg‘on. Bu haqda AOKAda o‘tkazilayotgan brifingda Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov ma’lum qildi.
Mutaxassisning ta’kidlashicha, bu kasallik mamlakat hududida biror marta qayd etilmagan. Qayd etilishicha, Afg‘onistonda aniqlangan vabo kasalligi O‘zbekistonga kirib kelgani haqida tarqalgan ma’lumotlar haqiqatga to‘g‘ri kelmaydi.
Ma’lumot uchun, vabo (cholera) ingichka ichakning zararlanishi, intoksikatsiya, umumiy ahvolning og‘irlashuvi va organizmning suvsizlanishi bilan davom etadigan o‘tkir infeksion o‘ta xavfli ichak kasalliklaridan biri hisoblanadi.
Vabo vibrioni daryo suvida 18 kundan 5 oygacha, muzda bir necha oy, ariqlarda bir necha kun, dengiz suvida ikki hafta, sovuq vaqtda najasda bir necha oy, axlat chuqurlarida 3 oygacha, ichki kiyimlarda 2 oy, qum tuproqda bir necha oy, suv havzalarida 15—30 kun, sut va yog‘da bir oygacha, kartoshkada 2 haftagacha, ho‘l mevada bir necha kungacha tirik qolishi mumkin.
Dezinfeksiyalovchi moddalar vibrionni tez o‘ldiradi. Suv qaynatilganda ham vibrion tez o‘ladi.
Avvalroq O‘zbekistonda ichimlik suvi quvurlari va jo‘mraklar orqali vabo kasalligi tarqalgani haqidagi xabarlar yuzasidan ma’lumot berilgandi. “O‘zsuvta’minot” ushbu xabarlar mutlaqo asossiz ekanini ma’lum qilgan.
Izoh (0)