Osiyo taraqqiyot banki (OTB) rivojlanayotgan Osiyo-Tinch okeani mintaqasi mamlakatlari uchun joriy yilda iqtisodiy o‘sish prognozini 4,6 foizgacha pasaytirdi. Bu haqda “Daryo”ga bank hisobotidan ma’lum bo‘ldi.
Mazkur prognoz OTB tomonidan aprel oyida e’lon qilingan 5,2 foiz prognozi bilan taqqoslanadi. Bank oziq-ovqat va yoqilg‘i narxlarining oshishi tufayli mintaqa uchun inflyatsiya prognozini ham oshirdi.
OTBning “Osiyo rivojlanishi istiqbollari”ning (Asian Development Outlook) 2022-yilgi nashriga qo‘shimchasida aytilishicha, Osiyo va Tinch okeani mintaqasidagi rivojlanayotgan mamlakatlar COVID-19 pandemiyasidan so‘ng tiklanishda davom etmoqda.
Bundan tashqari, rivojlanayotgan Osiyoda COVID-19 ga qarshi emlash darajasi sezilarli darajada oshdi.
Hisobotda keltirilishicha, O‘zbekistonda 60 foizga yaqin aholi kovidga qarshi emlangan va taxminan 46-48 foiz aholi to‘liq vaksina qabul qilgan.
Tojikistonda emlanish darajasi 65 foizga yaqin bo‘lsa, Qozog‘istonda — 61 foiz. Qirg‘izistonda bu ko‘rsatkich juda past saqlanib qolmoqda — 25 foiz.
Ko‘pgina davlatlar tomonidan cheklovlarning yumshatilishi iqtisodiy faollikning oshishiga olib kelmoqda.
Biroq, COVID-19 bilan bog‘liq yangi cheklovlarning o‘rnatilishi va zaif global talab tufayli mintaqaning eng yirik iqtisodiyoti bo‘lgan Xitoyda o‘sish sekinlashdi.
Ukrainadagi urush oqibatlari inflyatsiya bosimini kuchaytirdi va bu o‘z navbatida butun dunyo bo‘ylab markaziy banklarni foiz stavkalarini oshirishga majbur qilayotganligi sababli o‘sishni to‘xtatib qo‘ydi, — dedi bank bosh iqtisodchisi Albert Park.
Rivojlanayotgan Osiyo va Tinch okeani mintaqasi mamlakatlaridagi inflyatsiya bu yil oldingi 3,7 foiz prognozga nisbatan 4,2 foizga tezlashishi kutilmoqda.
Biroq, umuman olganda, mintaqada inflyatsiya bosimi hali ham dunyoning boshqa joylariga qaraganda past.
OTB mintaqa uchun 2023-yil iqtisodiy o‘sish prognozini 5,3 foizdan 5,2 foizga tushirdi va inflyatsiya prognozini o‘z navbatida 3,1 foizdan 3,5 foizga oshirdi.
Ba’zi hududlar uchun o‘sish prognozlari oshirildi. Janubi-Sharqiy Osiyo uchun prognoz COVID-19 cheklovlarining yengillashtirilishi natijasida ichki talabning oshishi sababli bu yil 4,9 foizdan 5 foizga oshirildi.
Kavkaz va Markaziy Osiyo bo‘yicha prognoz 3,6 foizdan 3,8 foizga oshirildi, chunki ushbu hududdagi ba’zi davlatlar Rossiyaning Ukrainaga bostirib kirishining iqtisodiy oqibatlarini kutilganidan ko‘ra yaxshiroq yengib o‘tdi.
2021-yildan 2022-yilning 14-iyuligacha bo‘lgan davr uchun O‘zbekistonda asosiy stavka 2 foizga ko‘tarilgan. 21-iyul kuni esa Markaziy bank asosiy stavkani 1 foizga pasaytirib, 15 foiz etib belgiladi.
OTB hisobotida keltirilishicha, Qozog‘istonda asosiy stavka 2021-yilda ham oshirilgan. Joriy yilda esa bu ko‘rsatkich yana ham tezlashdi. Yil boshidan beri asosiy stavka Qozog‘istonda 4,25 foizga ko‘tarilgan.
2022-yilda aksariyat valyutalar AQSH dollariga nisbatan qadrsizlandi. O‘zbekistonda so‘mning dollarga nisbatan yil boshidan beri qadrsizlanishi 1,2 foizga teng bo‘ldi.
Tinch okeanida Fijiga turizmning tiklanishi sababli subregionning o‘sish prognozi 3,9 foizdan 4,7 foizga yaxshiladi.
OTB o‘ta qashshoqlikka barham berish bo‘yicha sa’y-harakatlarini davom ettirib, rivojlangan, keng qamrovli va barqaror Osiyo va Tinch okeani mintaqasiga erishishga intiladi.
Bank 1966-yilda tashkil etilgan bo‘lib, unga 68 mamlakat a’zo bo‘lgan. Ularning 49 tasi mintaqada joylashgan.
Izoh (0)