Farg‘ona viloyati Chimyon qishlog‘ida ijaraga berilgan yerni sotmoqchi bo‘lgan fuqaro ushlandi.
2022-yil 18-iyul kuni Farg‘ona viloyat IIB boshlig‘i nomiga fuqaro M.U. ariza bilan murojaat qilib, unda Chimyon qishlog‘i hududida joylashgan, 49 yil muddatga shartnoma asosida foydalanishga berilgan 5 gektarlik bog‘dorchilik yo‘nalishidagi fermer xo‘jaligi yer maydonidan 60 sotixini S. ismli shaxs egalik huquqisiz, hech qanday hujjatlarsiz 7 000 AQSH dollariga sotishini ma’lum qilganini bildirgan. S. ismli shaxsga nisbatan qonuniy chora ko‘rishni so‘ragan.
Mazkur ariza yuzasidan 2022-yilning 18-iyul kuni Farg‘ona viloyati prokuraturasi hamda Farg‘ona viloyati IIB JQB, Korrupsiya va iqtisodiy jinoyatlarga qarshi kurashish bo‘limi xodimlari tomonidan o‘tkazilgan tezkor tadbir davomida, S.ning ukasi R.D. “Chimyon” mahalla hududida arizachi M.U.dan kimyoviy ishlov berilgan 7 000 AQSH dollari miqdoridagi pullardan o‘zaro kelishib 6300 AQSH dollarini olgan vaqtida daliliy ashyolar bilan ushlandi.
Mazkur holat yuzasidan Farg‘ona tumani IIB huzuridagi tergov bo‘limi tomonidan Jinoyat kodeksining 168-moddasi 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Yuqorida ko‘rsatilgan jinoyatni sodir etgan shaxs besh yilgacha ozodlikdan mahrum qilish bilan jazolanishi mumkin.