Buxorodagi xonadondan qariyb 50 mln so‘mlik buyumlarni o‘g‘irlab ketgan shaxslar oradan bir yil o‘tib topildi

Buxoro viloyati Kogon tumanida bir yil muqaddam sodir etilgan o‘g‘rilik jinoyati fosh etildi, deb xabar beradi viloyat Ichki ishlar boshqarmasi.

Qayd etilishicha, Kogon tumani IIIB tomonidan berilgan ma’lumotga ko‘ra, 2021-yil 25-avgust kuni soat 10:00 larda noma’lum shaxs “Taraqqiyot” mahallasida yashovchi N.F.ning (1990-yilda tug‘ilgan) uyiga g‘ayriqonuniy ravishda kirgan. Uning yotoqxonasidagi shkaf ichidan 20 turdagi tilla taqinchoqlar, 120 dollar, 5 000 rubl va 250 000 so‘mni yashirin ravishda o‘g‘irlab, jabrlanuvchiga 49 550 000 so‘m miqdorda moddiy zarar yetkazgan.

Holat yuzasidan Jinoyat kodeksining 169-moddasi (o‘g‘rilik) 2-qismi bilan jinoyat ishi qo‘zg‘atilgan. Bir qator tezkor surishtiruv hamda tergov harakatlari olib borilgan. Ammo jinoyat sodir etgan shaxslarni aniqlashning imkoni bo‘lmagan.

Oradan bir yil o‘tib, mazkur jinoyatni Samarqand viloyati Jomboy tumani Ko‘kgumbaz mahallasida yashovchi A.O. (2000-yilda tug‘ilgan) o‘zining jinoiy sherigi J.F. (2000-yilda tug‘ilgan) bilan oldindan jinoiy til biriktirib sodir qilgani aniqlangan va ashyoviy dalillar bilan qo‘lga olingan. Jinoiy guruh boshqa viloyatlarda, shuningdek, Buxoro viloyatining Buxoro tumanida ham o‘g‘rilik jinoyatini sodir etgan.

Hozirda ularga qamoqqa olish tarzidagi ehtiyot chorasi qo‘llanilgan holda, boshqa jinoyatlarga aloqadorligini aniqlash yuzasidan tergov harakatlari davom ettirilmoqda.