Samarqand viloyati Past Darg‘om tumanida bir guruh shaxslar sodir etishi mumkin bo‘lgan katta janjalning oldi olindi. Bu haqda viloyat ichi ishlar boshqarmasi axborot xizmati ma’lum qildi.
Xabar qilinishicha, “Zangiboyi” mahallasi hududidagi oshxonalarning birida ikki kishi ovqatlanib o‘tirgan. Past Darg‘om tumani “Baxshiboyi” mahallasida yashovchi, ularga oldindan tanish bo‘lgan Sindor, Asad, Ramziddin, Kamron, Ma’ruf hamda Ali ismli shaxslar mast holatda hech bir sababsiz baqir-chaqir qilib, ularni yoniga chaqirgan va salomlashmaganini vaj qilib, janjal ko‘targan.
Viloyat IIB JQB Uyushgan jinoyatchilikka qarshi kurash bo‘limi xodimlari tomonidan olingan tezkor ma’lumotlarga asosan, hodisa joyiga IIBning tezkor xodimlari hamda Tezkor vazifalarni bajaruvchi safarbar otryadi xodimlari yetib borib, barcha shaxslar ushlanib, janjalning oldi olingan.
Aniqlanishicha, tumandagi “Zangiboyi” va “Baxshiboyi” mahallalarida yashovchi ushbu shaxslar o‘rtasida oldindan kelishmovchilik bo‘lgan. Holat yuzasidan ushbu janjalga yetakchilik qilgan 6 nafar shaxsga nisbatan Samarqand viloyati IIB huzuridagi tergov boshqarmasi tomonidan Jinoyat kodeksining 277-moddasi 2-qismi “b” bandi bilan jinoyat ishi qo‘zg‘atilib, 2 kishi qamoqqa olingan.
Izoh (0)